A cera e crusada di Palm Beach parcialmente. Trafico ta pasa pero, mirando cu diamars, DOW a bay pone diferente obstaculo riba caminda, pa asina wak si toch esaki por ta un señal pa chauffeurnan, pa nan baha nan velocidad, pero toch e no a yuda.
Diaranson mainta, tabata tin un otro accidente. Polisnan ta man yen cu tantisimo accidente. Si no ta un, ta dos, tin biaha asta tres accidente pa dia.
Esey a causa tambe, cu a dicidi cu diaranson nan ta cera e caminda completamente, pa crusa, mirando cu e intento di diamars, no a yuda.
Cu otro palabra, trafico cu ta bin for di Marriott, bayendo Playa, por lora bay na man drechi, esta McDonald’s y e resto di e hotelnan. Of ta bay straight Playa. Ora e yega na e rotonde nobo banda di Superfood, e ora por lora pa bay bek Noord, pa e por yega pa bay direccion e ora Citgo Palm Beach.
Tur trafico por bay Playa y tur trafico por bay Noord. Si bo ta biniendo di Citgo Palm Beach, y bo tin cu yega por ehempel na McDonald’s, bo no por crusa mas. A pone baricada. Cu otro palabra, bo tin cu bay man drechi obliga. E ora bo ta busca un manera pa por logra pa bin bek.
Ta importante pa tur automobilista tuma nota cu tin cambio. E crusada ta habri, pero bo no por crusa. Autonan no por pasa di un banda pa e otro direccion p’ariba y p’abao. Solamente por bay Playa y bo por bay Noord. Ta e unico forma cu bo por haci uso di e caminda aki. Esey ta pa motibo di e tantisimo accidente cu a sosode riba e caminda aki.
Danki Dios, no tin morto den trafico ultimo tempo riba e crusada aki, aunke cu tabata tin varios di nan cu hende herida, hopi daño material, etc.
Asina mes tin conductornan cu ta sigui haci uso di e caminda como shortcut, pa evita pa nan bay te na e rotonde di Superfood. Nan ta subi acera y sigui direccion Citgo Palm Beach.
Tur dia cu tin un accidente, polis mes a bisa cu lo bin un rotonde, pero te dia di awe, nada. Den e ultimo dianan cu polis tabata tey pa dirigi trafico, y awor aki a dicidi pa cera e crusada mes pa crusa. Tin obstaculonan di DOW eynan, mirando cu e luznan ta daña ya pa algun luna caba. No sa te ki dia e rotonde lo bay bin na e crusada peligroso aki. Di un banda ta bon cu nan a cer’e, pero tin hopi automobilista ta pensa cu no ta loke nan tabata kier.
Ta spera cu esaki por evita accidente. Turistanan kisas lo por bruha tiki, pero por lo general tur cos por cana nechi sin accidente.
