Diasabra a duna inicio n’e gran celebracion di Aruba su Carnaval 70.Minister-President, Evelyn Wever-Croes, den representacion di Minister di Cultura, mr. Xiomara Maduro cu ta sufriendo di un kebrante di salud, tabatin e honor di cende e mechanan pa asina duna inicio n’e parada.
“Pabien Aruba cu 70 aña di Carnaval, Ban Goza!”, tabata e palabranan di Prome Minister di Aruba, mr. Evelyn Wever-Croes.
“Danki na SMAC y tur cu ta contribui na engradece nos Carnaval, ban cuida nos oido y muchanan.”
“Disfruta di e Parada di Flambeu, pabien Aruba, celebr’e den grandi awenochi cu diesun banda y 9 mil persona riba pia,” tabata loke Presidente di SMAC, Darren van Ommeren, a bisa.
Ta bon pa conta bo e storia tras di e parada aki.
A funda SAC oficialmente na aña 1966 y un aña despues, na aña 1967, Aruba Tivoli Club a organisa su prome Fakkel Optocht, cu a sali for di crusada George Maduro straat y Adriaan Lacle boulevard, bay nort, drenta Wilhelminastraat na e brug di Elmar y caba na Tivoli Club. E prome parada tabata compaña pa un steelband y fakkelnan di glas fia for di Mariniers Kazerne. Ey a cuminsa e prome ‘voorfeest’ di carnaval, cu eleccion di e figuranan carnavalesco di e club.
Fakkel a crece bao guia di Tivoli Club, specialmente despues cu a habrie pa no- miembronan tambe. Na aña 2009, cu ainda Fakkel Optocht tabata oficialmente riba e programa di SAC como Tivoli Fakkel Optocht, e team coordinador di e parada a dicidí di pasa e coordinacion pa SAC, cu despues a pas’e pa SMAC.
Como tal, awe ta despues di 57 aña cu a start cu Fakkel Optocht, cu miles di hende ta uni pa celebra e prome parada di carnaval di Aruba. Pa algun aña caba, Fakkel Optocht ta e parada cu mas participante na Aruba y a bira mas bien un evento pa gruponan di carnaval por recauda fondo pa cubri gastonan halto di e otro paradanan.
Pa participa den Fakkel Optocht, gruponan ta cobra un suma fiho, pa cual participantenan ta haya un T-shirt y den algun caso “open bar” durante e parada cu ta bay compaña pa un banda musical.
Headlines Group, cas editorial di 24ora.com y TREMPAN ta desea Minister Xiomara Maduro un pronto recuperacion.
