Gino Henriquez ta na Hulanda desde 2020. El a yega den temporada di Coronavirus, net momento cu cos no tabata mucho bon na Aruba cu trabou. E cosnan tabata dificil na Aruba, pero na Hulanda e ta chauffeur di bus. Na juli e ta haci dos aña haciendo e trabou aki. Awo cu e ta eynan e ta biba bon y e no por keha p’esey.
Na Aruba e tabatin un bida ‘ups and downs’, unda un rato e tabata bon y otro rato no. El a indica cu na Aruba e mentalidad di hende ta cu “bo ta keda c’un stempel” y no ta haya un chens pa bay dilanti of mustra cu di berdad di kier of por, di kier cambia. Na Aruba hende no ta haya e chens pa mustra cu kier bay dilanti. Esey a pone cu Henriquez a dicidi di haci un cambio. El a bay Hulanda y cuminsa desde abou bek.
El a cay cera y esey a pone cu e no tabata kier un bida asina. Segun Henriquez, el a keda un par di siman na un luga na San Nicolas y un bon persona, un conoci, a yud’e. El a traha cu ne y a spaar su placa p’asina por a cumpra su ticket pa bay Hulanda. El a cuminsa desde abou.
Su mensahe pa tur hende ta: “E ta simpel. Si bo no pone di bo mes, wak e caminda cu bo kier cambia bo bida, bo no ta logra. Tanto bal bo ta cay cera, drenta un rehab y sali, bo no kier cambia. Toch bo ta haya bo cu bo ta bay mesun caminda y bo no ta cambia. Bo mester kier di bo mes.”
Pa mas lesa TREMPAN.COM.
