Recientemente a tuma luga un encuentro anual interno organisa pa Embahada di Reino Hulandes na Washington DC pa tur consul honorario di Reino Hulandes na Merca. Debi na restriccionnan di salud rond di Covid-19, no a organisa e evento aki durante e ultimo dos añanan.
Minister Plenipotenciario di Aruba staciona na Embahada di Reino Hulandes na Merca, mr. Joselin Croes a bende e producto Aruba na tur e consulnan di Reino Hulandes staciona tur rond di Merca. A convence e representantenan diplomatico cu Aruba tin mucho mas di ofrece cu djis santo blanco, lama blauw y solo cayente henter aña.
Ta bon pa menciona cu Reino Hulandes tin un total di 30 consul honorario staciona rond di henter e continente Americano. Esaki ta separa di e Embahador staciona na Washington y consuladonan general na New York, Atlanta, Chicago, Miami y San Francisco. Lo demas ciudadnan ta conta cu un consul honorario cu tambe t’ey pa atende tur asunto consular y economico pa henter Reino Hulandes.
Durante e presentacion, embahada a informa di e trabounan cu ta realisa riba tereno consulario, economico, innovativo, agricultural y defensa. Y ta probecha pa presenta e vision di Hulanda.
A elabora riba, entre otro, e efecto y retonan cu Covid a bin cu ne, a splica posicion di Reino Hulandes riba e conflicto na Ukraina y sin lubida e tema di awendia, esta integridad.
Aruba tambe a haya oportunidad pa presenta nos seis pilarnan economico y pa pidi e consulnan pa tene nan wowo y orea habri pa oportunidadnan na Merca pa Aruba riba energia renovabel, hydrogen, inversionnan den logistica, tecnologia, educacion y mas.
E evento a sirbi como un bon momento pa netwerk cu e ekipo Hulandes cu ta representa Reino na Merca. Claro cu nan tur conoce e oportunidad cu Aruba tin di ofrece, pero den tipo di eventonan asina, ta haya un bon chens pa corda nan.
