Diadomingo dia 27 di augustus tabatin un concierto di kita sombre atrobe na Biblioteca
Nacional na Playa, organisa pa Fundacion pa Talento Musical Donny Laclé. E publico a
gosa di loke nos musiconan a ofrece: bon musica, harmonia, colegialidad y profesionalismo. Maestro di ceremonia, Percey Jeandor, a guia e programa na su manera humoristico di semper. E concierto a habri cu presentacion di Harlan Venner, un bolerista masha conoci na
Colombia, Venezuela y aki na Aruba. Harlan a canta diferente biaha caba den nos concierto. Cu su bos sonoro y romantico el a encanta su publico y a pone diferente pareha subi pista, specialmente ora el a laga algun salsa y merengue rezona. Despues di Harlan a sigui un variacion masha interesante di musica instrumental. E hoben Angelo Kock ta habri e parti aki como solista cu algun piesa riba piano. Su potpourri di piesa conoci a invita sala pa canta.
Ivan Quandus (baho) y Carlos Bislip (drum) a subi escenario despues pa forma un trio cu Angelo. E piesanan tabata por lo general propio composicion y a cay masha na smaak. Den e ultimo parti di concierto Nel Scholten a completa e ensemble aki cu e zonido suave di steelpan. Un combinacion unico. Comision organisado ta gradici tur e artistanan aki pa nan contribucion impagabel. Y naturalmente, tur hende cu a contribui den e caha di donacion, mil y un danki. E placa aki ta pa un bon causa: e ta aporta na desaroyo musical di nos talentonan. Comision organisado ta invita tur hende for di awor caba pa e siguiente concierto cu no lo tuma luga diadomingo dia 24 di september, sino diadomingo 1 di october. E cambio aki ta motivo cu biblioteca ta un stemlokaal dia 22 di september.