Residente y negoshinan a ricibi peticion di parti di prome minister William Marlin, pa completa nan preparacionnan pa diamars atardi, mientras cu Horcan Irma ta sigui cu su rumbo pa e area local.
E pais a wordo poni bao di un hurricane warning door di e Departamento di Meteorologia pa 11’or di mainta, dialuna . Condicionnan di tempo ta wordo spera pa deteriora pa diamars atardi.
Marlin a tene su di dos reunion como Hefe di e Centro di Operacionnan di Emergencia (EOC) riba diadomingo.
EOC lo tene un reunion awe un biaha mas pa asina dicidi status di e scol, negoshi y oficinanan di Gobierno pa diamars. Notificacion y informacion lo wordo divulga den medionan di comunicacion y tambe via e stacion di radio di gobierno 107.9 FM riba e preparacionnan y tambe advisories relaciona cu Irma.
Segun medionan di St. Maarten, mas of menos 90 miembro di marina Hulandes lo yega awe for di Corsou y Aruba. Marlin a pidi nan asistencia como “medidanan di precaucion” riba diabierna.
Shelter
Tambe e residentenan ta wordo recorda cu e shelternan lo wordo uza solamente como ultimo opcion ya cu nan lo ta habri despues cu e horcan pasa y lo ta habri solamente pa 48 ora. Hendenan cu haci uzo di shelter mes mester bin cu nan propio awa y cuminda procesa of den bleki (non-perishable). Esnan cu no ta sinti nan mes sigur den nan cas prome cu yegada di e horcan, tin cu haci preparacionnan pa bay keda cerca un famia of amigo prome cu e horcan toca tera. Residentenan ta wordo pidi pa no warda te na ultimo momento pa evacua nan cas. Evacuacion lo tin cu wordo haci prome cu e horcan y
ega, ya cu first responders lo no por sali durante di e horcan pa efectua rescate y tambe awanan torencial tambe por inunda e camindanan.
Aeropuerto
Pa loke ta e aeropuerto, pa diaranson mainta, Princess Juliana International Airport, lo suspende tur operacion como un medida di precaucion desde diamars, pa 2’or di merdia.
Biahamento publico ta wordo conseha pa check cu e aerolineanan pa mas informacion. COO/Acting CEO di e aeropuerto, Michel Hyman, a splica cu nan ta lamenta cu esaki por causa cualkier inconveniencia den e caso aki, pero mester estresa cu e siguridad di tur ta un prioridad number 1 na e aeropuerto di SXM. Nan lo monitorea e desaroyonan di e horcan di cerca, mientras cu e ta pasa riba e area y lo mantene tur personal, usuario y stakeholder informa di cualkier desaroyo cu esaki por trece, via varios medio di comunicacion.
Yenamento di gasolin
Tambe, habitantenan di St. Maarten ta acudi en masa na e diferente stacionnan di gasolin, pa asina yena nan auto, mirando cu e tempo malo ta acercando.
Pa loke ta e cas y edificionan, nan ta wordo cera cu palo como medida di precaucion. Ya caba Cruz Cora, manera nos a anuncia den un articulo anterior, di tanto Corsou como Aruba, ta preparando pa manda voluntarionan na St. Maarten pa duna un man.
Saba y St. Eustatius
Un Hurricane Warning ta en efecto pa tanto Saba como pa st. Eustatius. Pa diamars e pasada di Irma lo bira west noordwest. Riba e ruta aki, e centro di Irma lo wordo spera pa yega Isla Riba diamars laat y lo move west noord di Saba y St. Eustatius pa diaranson. Aunke cu ta un direct hit, unda cu Irma lo move directamente riba e islanan, no por wordo descarta.
