Aruba a experencia un crecemento significativo den e ultimo decada, pero e crecemento aki a trece cu ne problema serio, specialmente relaciona cu rioolwaterzuiveringsinstallatie (RWZI), esta e planta di purificacion di awa na Bubali. E falta di mantencion adecua y expansion necesario di e planta aki, a resulta den un mal maneho critico cu ta pone salud publico, medio ambiente y e reputacion turistico di e isla na riesgo, asina Managing Director di Amsterdam Manor Beach Resort NV, esta Jurgen van Schaijk, a bisa den un carta habri pa tanto gobierno, parlamento y e instancianan encarga cu awa residual na Aruba.
E ta sigui bisa den e carta cu for di varios aña caba, e gobiernonan no a asigna e recursonan publico necesario pa mantene y expande e capacidad di RWZI. Como resultado, e planta ta den un estado deplorabel, descargando awa residual practicamente sin trata, den Bubaliplas y finalmente, den lama entre Eagle Beach y Palm Beach. E problema aki no solamente ta afecta turista y residente cu mal holo y pester di insecto, sino tambe ta representa un menasa directo pa salud publico, manera cu e rapport di Carmabi a demostra!
Historia di negligencia y accion legal
Jurgen van Schaijck ta sigui bisa den su carta cu Amsterdam Manor Beach Resort NV a lucha varios aña pa gobierno tuma medida urgente pa mitiga e problema aki. Na aña 2002, e problema cu RWZI ya tabata asina grave, cu a firma un ‘settlement agreement’. Sinembargo, e gobierno no a cumpli cu e compromisonan, loke a hiba na disputa nobo, incluyendo un serie di orden hudicial den e ultimo añanan cu a exigi accion concreto pa mehora e situacion.
Dia 8 di mei 2024, corte a ordena gobierno pa implementa medida inmediato, manera bio-augmentation. Tambe a ordena e instalacion di planta mobil di tratamento di awa residual cu un capacidad di por lo menos 12 mil metro cubico pa dia te ora cu construi un planta nobo.
![](https://24ora.com/wp-content/uploads/2024/05/IMG_5825-2.jpg)
Necesidad pa un planta nobo di tratamento
E construccion di un planta nobo di tratamento di awa residual cu un capacidad minimo di 15 mil metro cubico pa dia ta urgente. Segun Aruba Wastewater Sustainable Solutions NV, e compania nobo cu Gobierno di Aruba a lanta pa maneha e planta, a bisa cu e planta aki por drenta den operacion den tres aña di tempo. Por lo tanto, ta vital cu e ley actual inclui e obligacion cu Aruba Wastewater Sustainable Solutions NV ta completa e planta nobo aki pa dia prome di juli 2027.
Financiamento y norma di emision di holo
Ta crucial pa sigura e financiamento p’e inversionnan necesario a corto plaso. Den e carta ta sigui bisa cu a propone un combinacion di impuesto temporal riba e ED-card y un aumento di impuesto special di alohamento (BBV). Ta recomenda un combinacion di un tarifa temporal pa inversion inmediato y un impuesto basa riba e uzo di awa pa sigura un financiamento adecua.
![](https://24ora.com/wp-content/uploads/2024/05/440483024_751036227195422_8494162395825017354_n-1920x1280-1.jpg)
Lucha di 25 aña
Jurgen van Schaijk ta skirbi den su carta: “Despues di 25 aña di lucha, esaki a resulta nos indiferente. Sinembargo, den nos opinion mester prefera e implementacion di un impuesto hibrido. Miho bisa, un di e impuestonan menciona anteriormente p’e ehecucion di e inversion necesario a corto plaso. Por lo tanto, cu un caracter temporal. Despues tambe mester introduci un impuesto di riool cu un tarifa pa cada metro cubico di awa, basa riba e uzo di tur esunnan conecta na e sistema di riool.”
RWZI nobo mester cumpli cu standard internacional
Mas leu e ta skirbi cu ta necesario pa establece normanan di emision di holo di acuerdo cu e reglanan di Union Europeo pa evita cu e problema minimalisa temporalmente. E planta di RWZI nobo mester cumpli cu e standard internacional, Jurgen van Schaijk a comenta den e carta, agregando cu mester impone regla estricto pa descarga di vet, azeta y otro desperdicio (Fat, Oil, Grease = FOG) di parti di hotel y restaurant, cu multa severo p’esunnan cu ta viola e reglanan aki.
P’e RWZI nobo, mester otorga un hindervergunning, despues di realisacion di un estudio di MER. Tambe mester cumpli cu e protocol, asina yama LBS. Fuera di esey, mester establece rekisito di acuerdo cu e standardnan internacional.
Inaugura RWZI nobo na juli 2027
Ta hopi necesario cu tur loke nos a bisa anteriormente inclui den e tratamento di e proyecto di Landsverordening. E RWZI nobo mester ta cla no mas tarda cu dia 1 di juli 2027, teniendo na cuenta loke a menciona anteriormente. E norma di holo por ta desaroya adicionalmente mediante un decreto of un Ministeriele Beschikking. Sinembargo, e base legal p’esaki tambe mester ta parti di e proyecto di Landsverordening riba e transferencia di e sistema di riolering y e instalacion di un incinerator di sushi. E aspecto aki tambe a ignora inhustamente.
![](https://24ora.com/wp-content/uploads/2024/05/441254705_751036217195423_8718700649035424938_n-1920x1280-1.jpg)
Yamada urgente na gobierno y parlamento
No por tin ningun discusion riba e necesidad pa tuma medida di emergencia pa preveni molester grave te ora cu e RWZI nobo ta cla, den confromidad total cu e sentencia di e caso sumario di dia 8 di mei 2023. Esaki mester ta parti di e proyecto di e Landsverordening riba e transferencia di e sistema di riolering y instalacion di e incinerator di sushi.
Jurgen van Schaijk: “Mesun cos ta aplica na realisacion di e RWZI nobo, su ubicacion y su fecha limite. Esaki mester ta prioridad y tambe mester garantisa financiamento di e fondonan necesario p’esaki y p’e medidanan di emergencia a corto plaso”. Esaki ta aplica mesun cos n’e costonan di mantencion anual mediante un impuesto riba riolering. Esaki tambe mester ta parti di e proyecto aki di Landsverordening, el a agrega.
Conclusion
Ta crucial pa Gobierno y Parlamento di Aruba tuma e medidanan necesario pa inclui e cambionan aki den e ley actual riba transferencia di e sistema di riolering y planta di incineracion di sushi. Solamente cu e implementacion di medida urgente, e construccion di un planta nobo di tratamento y e garantia di financiamento adecua por atende cu e problema aki di manera efectivo, protegiendo asina salud publico y e reputacion turistico di Aruba, asina Jurgen van Schaijk a finalisa den su carta.
![](https://24ora.com/wp-content/uploads/2024/05/441345280_751036137195431_1898825145034359499_n-1920x1280-1.jpg)
E reunion publico di parlamento
E reunion publico di Parlamento di Aruba pa trata specificamente e ley aki pa crea e compania nobo, pa introduci un impuesto nobo pa atende cu e planta di RWZI, etc. ta programa pa tuma luga dia 30 di mei proximo. Te awo no tin obhecion riba e ley pero si tabatin diferencia di opinion grandi den coalicion riba con ta yega na e fondonan. Raiz a pensa pa hinca un impuesto di US$ 35 pa cada turista cu drenta Aruba. Pero MEP ta prefera di cobr’e den e Environmental Levy. Tin otronan den Parlamento di Aruba ta opina cu mester cobra tur hende conecta riba e sistema di riolering di gobierno, pues hasta e ciudadanonan den Playa of cu ta biba cerca di Bubaliplas, pasobra nan tin un bentaha cu otronan no tin. Tur otro cas na Aruba mester tin nan mesun pos y paga un compania pa chic’e cada pasa tanto tempo.
E reto di RWZI
E planta di purificacion di awa ta diseña pa maneha 4500 cub di awa pa dia. Na aña 1970 a cuminsa cu e construccion di e planta, cu a drenta den servicio finalmente na aña 1972 cu un capacidad di 4500 cub di awa pa dia. Na aña 1995 a haci e prome expansion di e planta y a hacie semi automatico. A buta e di tres parti di e planta door cu tabata manda e awa pa Tierra del Sol Golf Course. A amplia e capacidad pa 9000 cub pa dia. E tempo ey a cambia tur e rotornan y buta algun mas pa asina cumpli cu 9000 cub di awa.
Ni cinco aña despues e planta tabata ricibi entre 11.000 pa 12.000 cub di awa pa dia. Mirando cu e crecemento di awa no a warda, segun e AWSP (afvalwaterstructuurplan) a cuminsa traha riba e di dos expansion di e planta cu tabata pa 15.000 cub pa dia. A cuminsa cu e construccion na aña 2005. A buta mas rotor pa cumpli cu e demanda di e cantidad di awa y e cantidad di voedingsstoffen presente den e awa, cu na su turno ta wordo calcula door di e cantidad di hendenan (EI) cu ta aangesloten riba e planta.
A adkiri dos rotor mas acerca pa por cumpli cu e demanda. A traha un tanki mas cu capacidad dos biaha y mey mas grandi cu e otro dosnan. Den e tanki nan ey ta separa e lodo for di e awa door di lag’e sak den fondo di e tanki. Si bo no tin e cantidad di zuurstof cu ta rekeri for e conteo haci, bo no ta haya afbraak den e proceso. E awa na final lo no cumpli cu e normanan cu e tin di cumpli cu ne. Consecuentemente no ta logra trasforma e bacterianan cu no mester di zuurstof pa purifica e awa. Asina na final e lodo lo no sak den fondo di e tres tankinan. Anto esey ta locual ta causa cu e awa ta hole hopi mas stinki cu ora e drenta e planta mes!
![](https://24ora.com/wp-content/uploads/2024/05/427845733_751036263862085_2744143069353107436_n-1920x1280-1.jpg)
Tocante RWZI
Rioolwaterzuiveringsinstallatie (RWZI) ta existi desde aña 1972 na e asina yama Bubaliplas. Cu tempo, nos isla a conoce hopi desaroyo economico den forma di construccion di varios hotel den e area cu a pone funcionamento di e planta bou hopi presion. Banda di e realidad cu mantencion no ta cana manera debe ser. Awendia e planta por procesa 4500 cub di awa pa dia, pero den bida real ta yega rond di 8000 cub pa dia, pues dobel di loke por maneha y procesa. Gobierno a dicidi di traspasa henter e planta, cu awo ta bou maneho di DOW, pa e bay pa un compania priva nobo Aruba Wastewater Sustainable Solutions NV, cu lo resorta bou di Utilities Aruba NV. Tin apetit di instancianan financiero pa financia e proyecto, cu lo keda cla den tres aña di tempo y lo ta apto pa maneha 15 mil cub di awa pa dia, cu pa awo ta suficiente di acuerdo cu e demanda y crecemento proyecta.
![](https://24ora.com/wp-content/uploads/2024/05/441247140_751036267195418_2364880822129226785_n-1920x1280-1.jpg)
![](https://24ora.com/wp-content/uploads/2024/05/441292539_751036167195428_4591813070750449051_n-1920x1280-1.jpg)
![](https://24ora.com/wp-content/uploads/2024/05/IMG_5828-2.jpg)
![](https://24ora.com/wp-content/uploads/2024/05/IMG_5816-2.jpg)