Tabata awe merdia pa 2:23pm cu un preso a huy for di Korrectie Instituut Aruba (KIA), pero den mas of menos 17 minuut a gar’e caba y a hib’e bek pa KIA. Un rato pasa e director di KIA, esta Gino Winklaar, a anuncia cu tabata e personal di Cuerpo Especial Arubano (CEA) cu a logra gara e fugitivo na un distancia di mas of menos 300 meter for di prizon.
E director di prizon a confirma cu tin un investigacion interno andando na e momentonan aki y asina e termina, por divulga mas di kico a pasa. Gino Winklaar a gradici na e trahadonan di CEA y tambe e cuidadonan di preso (KIA) pa a actua lihe den bon coordinacion y comunicacion. A mira e preso sali y di biaha nan tur a bay su tras, sea na pia of cu auto. E empleadonan di CEA a logra gara e preso den vecindario di prizon mes.
E preso tabata cera den un edificio pafo di e instituto, cu no tin e mesun nivel di siguridad. Despues di e ultimo huymentonan, gerencia di KIA a dedica nan mes na mehora e siguridad di edificio, pero awor mester drecha paden. Segun e director, ora di drecha paden mester realoca e presonan un rato. Aunke cu esey a pasa awe, tabatin un resultado positivo den menos di 20 minuut a gara esun cu a probecha di e situacion.
E preso Lindor R.B. Lloyd ta naci na Aruba dia 15 di maart 1994 y a drenta KIA bek recientemente. E detenido aki ta cera den e seccion cu ta ricibi guia psikiatrico, asina Gino Winklaar a enfatisa. Tin biaha ta dificil pa determina si un preso ta sufri di un deficiencia mental of no. P’esey tin biaha ta mescla e poblacion pa hala nan for di otro, pero no ta nifica pasobra e ta den e departamento aki, cu e ta sufri di problemanan psikiatrico.
Informacion di fuentenan den KIA a sigura cu e preso a sali for di porta dilanti di e prizon. E tabata haciendo un trabou hunto cu un cuidado di preso y como tal por tabata eydilanti. Asina el a mira un chens presenta, el a probecha y core sali for di e edificio y cura di prizon. Pero, a nota e movecion mesora, ora e tabata bandonando e area den direccion west, bisti cu short shinishi y un shirt color berde.
Tocante KIA
Korrectie Instituut Aruba, KIA, a muda pa su localidad na Santo di Patia na San Nicolas dia 22 di september 1990, pues 30 aña pasa. E prizon tin un populacion di un maximo di 200 detenido, parti den detencion preventivo, seccion di hende muhe y seccion di hubentud. Na KIA tin mas o menos 180 empleado trahando 24 ora pa dia pa garantisa siguridad y atende cu e presonan den cuadro di e periodo cu nan mester sinta nan castigo cu e meta pa coregi nan erornan y sali atrobe como miho ciudadanonan pa nos pais.