Diaranson dia 30 di december 2020 e lider di UPP a haya un sorpresa di un e-mail di abogado de Cuba, unda den un forma intimidante kier trata na silencia UPP y su lider, den su lucha contra actonan coruptivo y/o di malgobernacion di cualkier gobierno. Aki ta referi na 2 articulo unda cu a base di un articulo di Bon Dia Aruba di dia 18 di december 2020, e partido a cuestiona e supuesto nombracion di un “liaison officer” pa Aruba, cu pa colmo no tabatin un solicitud habri mes. UPP a reacciona mas bien pa e motibo cu e persona menciona, ta conoci como e “vertrouwenspersoon” di O.O., y consecuentemente na parecer di UPP, esaki ta mustra con keto bay O.O. tin influencia den e gobernacion POR RED MEP.
Mientras cu awor ta acusa e lider di UPP cu e lo ta daña nomber di e persona concerni, e partido tin di bisa cu ningun momento a menciona nomber di e persona en cuestion. Mientras cu Bon Dia Aruba si a publica e nomber por medio di un entrevista cu señor Abrahams, ta e Minister Presidente a reacciona mencionando nomber di e confidente di O.O. den Amigoe di Aruba di dia 22 di december 2020. Aki e Minister Presidente a desmenti cu e persona aki a keda nombra como “liaison officer” pa Aruba. Y esaki a pone cu UPP un biaha mas a reacciona, indicando cu ta trata atrobe di un confusion of interpretacion diferente of cu ta Hulanda ta esun cu ta nombra e “liaison officer”. P’esey ta straña UPP cu no a bay pidi cuenta na Minister Presidente mes of na señor Abrahams di Hulanda of na Bon Dia Aruba, pero ta acudi cerca lider di UPP pa reclama “tekst en uitleg.”
Den ningun di e 2 articulonan UPP a cuestiona estudio of experticio, ni integridad di e persona. Kisas pa desvia di loke UPP kier a trece dilanti, ta bin awor cu UPP kier a mishi cu e “integridad” y falta di estudio. Esaki ta un simpel “cheap-shot!” Esey no ta kita afo cu UPP tin un opinion hopi cla den esaki y p’esey ta bolbe bis’e, kisas awor mas cla!
UPP ta di opinion, e funccion di un “chief of staff” ta trece cu ne, cu e persona aki ta haltura di tur loke ta pasa den un oficina di minister, mescos tambe di tur documento entrante y saliente. Un di e tareanan mas importante di un funcionario asina ta pa cuida e minister pa e no comete actonan cu ta bay contra su huramentacion como mandatario. Ora cu un “chief of staff” scoge pa no haci esaki of di bira su cara otro banda, sea e no ta apto pa e trabou of deliberadamente e ta coopera. P’esey UPP ta keda straña cu e “chief of staff” aki na ningun momento por a lanta un “red flag”, sigur mirando awor cu ex minister O.O. tin 7 acusacion penal contra di dje. Y no lubida cu tin un denuncia di corupcion, abuso di poder etc. etc. di e ex minister den e caso di e incenirator chikito, cu e lider di UPP a haci un denuncia oficial na Ministerio Publico! Y aki tampoco e persona en cuestion no sa nada di dje?
Y un actitud asina ta significa pa UPP cu un persona asina simpelmente no por ta un “liaison officer” manera señor Abrahams a declara den Bon Dia Aruba. Y UPP ta di opinion pa bay mas leu cu un persona asina no por ta envolvi den un trabou manera esun cu e Minister President ta trata na splica. Y esaki no tin nada cu integridad y of su estudio!
Remarcabel ta cu ni e Minister President ni e persona en cuestion a pidi Bon Dia Aruba pa rectifica e informacion cu nan a trece dilanti, pa loke ta e nombracion aki. E situacion ta bruha mas si mira cu apenas algun dia despues, via medionan online Hulandes, ta sali un vacatura pa e posicion aki, via di Ministerio di Koninkrijksrelatie. Mientras cu aki na Aruba por mira cu na prome instante a menciona nomber como e “liaison officer”, mas cu un siman despues ta sali vacatura p’esaki. Pues e informacionnan ta keda confuso.
Loke si UPP ta hopi contento ta e hecho cu e carta intimidante di e abogado ta bisa cu eventualmente lo cuminsa cu un “bodemprocedure”! Den un tipo di procedura asina UPP lo tin e oportunidad di pidi tur documento relevante y yama tur testigo di moda, unda cu UPP por mustra di tin tur motibo di bisa cu e persona aki lo no ta mas apto pa un funcion importante asina. Pues cada bes cu UPP haya necesario pa mustra riba asuntonan asina ey, nan lo sigui hacie. “Bo mester ta hopi ingenuo pa kere cu bo ta e confidente di un ex minister na 2 ocacion, y cu bo no ta liga politicamente na e minister aki?,” lider di partido ta puntra. UPP kier evita pa Aruba ta strangula mas ainda, sigur mirando e acuerdo traicionero di Black Friday cu Hulanda.
UPP no ta kere cu un confidente di un ex minister cu den pasado yama e politico mas corupto cu Aruba a yega di conoce, lo por ta e persona indica pa ta ni un postbode di Aruba. Y aki no tin nada di haber cu su estudio of si eta integer of no. Ta door di keda keto y no lanta “red flag” pa e.o. corupcion of mal gobernacion a haci cu Aruba ta awe unda e ta. Esaki sigur no ta pas den e normal nobo cu mester conta na prome luga p’e politiconan!
