Diadomingo madruga pa 4:25am a notifica Polis via Kust Surveillance cu nan ta envolvi den un accidente na altura di ex Hulp Bestuurskantoor Savaneta. Na yegada di patruya a pidi pa ambulance di biaha mirando cu tin tres miembro di Kust Surveillance herida.
Dos patruya di Kust Surveillance a bay para un pickup Toyota Hilux y durante cu nan tabata atendiendo cu e chauffeur di e pickup, un Toyota Scion shinishi biniendo abao a bin dal tras di e Jeep di Kust Surveillance. E Jeep ey a dal tras di e pickup y e pickup a dal tras di e otro Jeep di Kust Surveillance para dilanti. Kiermen cuater auto envolvi di cual dos di Kust Surveillance. Tres miembro di Kust Surveillance a resulta herida. A detene chauffeur di e Toyota Scion y hib’e Warda di Polis.
Specialista di trafico a presenta y tambe polis tecnico pa haci nan investigacion. E tres pasaheronan den e Jeep a bay hospital y nan situacion ta stabiel. Esaki ta di dos y di tres unidad cu ta envolvi den un accidente den corto tempo.
Algun siman pasa tabata accidente na rotonde di FTA unda a pega den palo di lus y rotonde. E daño riba e vehiculonan ta asina grandi cu nan no por sigui traha riba caya y cuida e costanan. Nan ta enfoka mas tanto cu cuida costanan pa entrada di ilegalnan. Riba caminda marduga tin basta chauffeur bebi ta coriendo cu nan auto y cu cansancio no tin atencion riba caminda.
