Mester bay bin un klas den futuro y lihe, pa asina tapa mas buraco cu ta posibel segun Ricky Croes hefe di Douane.

Tin un manpowerplanning cu ta bay wordo haci pa bay wak kico e uitstroom, e doorstroom y instroom di Douane mester ta. Hunto cu esey un opleidingsplan pa asina regula y tur e opleidingnan cu ta bin, pa asina por sa con por pas esey den e begroting di Douane tambe.

Cuanto douanero falta

Croes a menciona cu tur cos ta depende cuanto hende ta bay cu pensioen y ki tempo nan ta bay cu pensioen. Basa riba esey tin cu planea ki tempo cuanto hende ta bay drenta y con e lesnan tin cu wordo duna, pa asina ey por purba di yena tur e vacaturanan cu tin.

Klasnan di dobbel

Un bon decision ta wordo tuma door di experiencia y experiencia bo ta haya hopi biaha door di mal decision. Den e caso aki lo bay tin problema tambe den futuro pasobra ta un grupo mucho grandi pa por duna e atencion suficiente na dje. Ta haci best si pa por duna locual cu nan tin mester pa por saca e miho di nan.

Control conhunto

Tin plan pa traha hunto cu polis, kustsurveillance, etc. Segun Croes, esaki ta canando. Tin cu bisa cu a haya peticion pa e autonan cu ta bay bin pa esey y a planea caba. A sinta cu polis y falta pa sinta cu kustwacht tambe. Ora cu polis sinta cu kustwacht y Douane, por traha riba e planificacion di e accion aki of e proyecto, con ta bay controla.

Den pasado a yega di controla den oranan no usual. Awo ta e momento oportuno pa cuminsa cun’e bek. Un cooperacion entre polis-Douane, un di e bevoegdheden di cada un di e cuerponan ta wordo aangevuld cu esun di otro y trahando conhuntamente cu Kustwacht tambe cu por cubri e parti di lama, por cera e fronteranan di Aruba pa tur cos ilicito cu ta drenta e pais aki, segun Ricky Croes.