Den cuadro di e reunion publico den Parlamento di Aruba e siman aki pa locual ta tratamento di Crisisheffing, parlamentario di fraccion MEP Daphne Lejuez ta enfatisa cu e introduccion di e asina yama Crisisheffing ta di indole temporario, y cu na e momento aki no tin otro opcion cu djis sigui busca un miho solucion.
“Nos ta tratando un ley hopi serio. E ta un ley cu ta afecta nos comunidad, y un ley cu di berdad mi lo desea no tawata necesario. Pero nos mester corigi e rumbo financiero di nos pais, pasobra si nos no haci esaki nos no por pone e hende central y yuda esnan mas vulnerabel den nos comunidad”, parlamentario Lejuez ta expresa. Pero alabes, e parlamentario ta bisa cu e lo desea di reitera cu e crisisheffing aki lo ta uno di indole temporario. “Nos lo sigui traha y busca solucion pa por reduci of elimina esaki lo mas pronto posibel”, e ta bisa.
“E ley cu nos ta pasa awe ta e resultado di un maneho iresponsabel di e ultimo ocho aña. Unda cu a opta pa inverti den tur sorto di proyecto di cual awe ainda nos ta liga cu e consecuencia manera un Green Corridor cu problema y un Horacio Oduber Hospital cu retraso”, e parlamentario ta sigui bisa. Sin lubida esnan mas cercano di e gobierno anterior cu a gana placa bruto cu contractnan miyonario, segun parlamentario Lejuez.
“Enbes di a enfoca riba e situacion doloroso cu nos hendenan tawata pasado aden.”
500 mil florin pa mehoracion di SABA
E parlamentario ta sigui bisa cu pa e motibo aki ta tristo cu esnan cu a contribui na e situacion actual, unda cu nos hendenan ta den un situacion social deplorabel, cu no a ricibi of haya atencion significante durante e presupuestonan di e ultimo ocho aña, awe ta para na banda ta duna critica enbes di lora manga pa yuda bin cu solucion.
Parlamentario Lejuez: “Di parti di coalicion ta trahando door di inverti 35 miyon den e proximo dos aña exclusivamente pa e sector social pa por brinda ayudo na nos hendenan. Cuido pa nos grandinan tawata den un estado deplorabel, unda cu na SABA nan cushina tawata den cay den otro. Awor a aloca 500 mil florin pa por mehora e situacion”. E parlamentario ta sigui splica cu: “A crea espacio financiero pa nos hendenan por haya vivienda of un pida tereno pa por construi nan cas y por hiba un bida digno, y nos a percura cu tin fondo pa por inverti den siguridad, asina aki teniendo e hende central.”
Studia segmento di ley mas cerca
Parlamentario Lejuez a trece dilanti den e reunion publico na parlamento tocante Crisisheffing, cu fraccion MEP a tuma nota cu a inclui un ‘verleggingsregeling’ como parti di e ley. E parlamentario a puntra si por a haya mas splicacion riba e parti aki mirando cu ainda no a pasa un ley pa locual ta trata electronisch verkeer/e-commerce. Tambe e parlamentario a puntra si gobierno lo por considera inclui esaki na un momento mas avansa ora di introduci e reforma fiscal pa asina por studia e entrada cu e lo por genera y su posibel efectonan economico. “Mirando cu e lo por trece confusion innecesario y lo aumenta e costo di haci negoshi, cu na su turno lo crea menos espacio pa inversion y creacion di cupo di trabou”, parlamentario Lejuez ta splica. Tambe e parlamentario kier sa con lo controla esaki of lo bay ehecuta esaki, mirando cu RvA tambe ta haci e pregunta aki den nan conseho, y ta referi specificamente na artikel I, onderdeel E, Y artikel II, onderdeel F. Esaki ta bisa cu ta e afnemer (empresario local) lo mester ta esun responsabel pa e pago di BBO/BAZV pa e leverancier di exterior ora nan cumpra servicionan di exterior. Incluyendo servicionan electronico cumpra of downloaded via internet. Parlamentario Lejuez: “Pues lo desea di por studia e segmento di ley aki mas di cerca prome cu pasa esaki sin mas.”
Begrotingskamer, un solucion structural
Fraccion di MEP a tuma nota cu durante e ultimo añanan e presencia di CAFT no a duna e resultado desea, es mas e situacion financiero di nos pais a keda empeora. Esaki mas bien pa motibo di a ricibi informacion irrealistico di gobernacion anterior, aña tras di aña, pa por cumpli cu norma, pues de facto mustrando cu den e forma cu CAFT a wordo introduci no tawata esun mas eficiente ni a duna e resultado premira.”Cual ta pa mehora e situacion financiero di nos pais”, segun parlamentario Lejuez. Mirando cu e aña aki e acuerdo cu CAFT lo termina, como tambe den presupuesto a traha espacio financiero pa por introduci nos propio begrotingskamer, e parlamentario a puntra e minister en cuestion kico ta e status di e begrotingskamer. “Mirando cu nos ta un pais autonomo, y un begrotingskamer lo ta un solucion structural cu lo hiba na mas transparencia, bon gobernacion y ultimamente na un fondo publico saludabel”, e parlamentario ta conclui.
