Diabierna awo lo ta un dia basta largo den corte. Lo trata e caso di asesinato cu a tuma luga aña pasa na San Nicolas. E dos acusadonan ta Zuriel Amiel Celaire y Izak Principaal, kendenan tin un serie di acusacion contra nan. Entre otro di asesinato di e hoben Sayuri Petronia, cu a shock comunidad.
Mas ainda ora cu a bira conoci cu e sospechosonan di e crimen aki tabata dos hoben menor di edad. Ta acusa Celaire y Principaal di intento di homicidio y posesion di arma di candela y ladronicia cu violencia na juni 2021.
Acusacion cu tin contra ambos ta como lo siguiente:
Ta acusa Izak Principaal di intencionalmente tuma bida di un persona riba 4 di juni 2021, door di los tiro cu un arma di candela riba dje, cu consecuencia cu e victima a fayece. Ta acusa nan tambe di conhuntamente cu un otro of otronan, posesion di un arma di candela y balanan riba 4 y 5 di juni 2021.
Ta acusa e hoben Zuriel Celaire di a comete violencia contra un persona riba 10 di januari 2020, dor di scop y dal e, tir’e cu baranca, saca cuchiu riba dj’e y zwaai cuchiu, a consecuencia di cual e persona a sufri algun hinca den su cara y heup. E tin contra dje acusacion di menasa cu morto y cendemento di candela contra un persona riba 14 di januari 2020 y a saca cuchiu zwaai cu ne y bis’e: “Cunucu ta di mi. Bo ta sigui ho**e. Mocha mi ta bay mocha bo. Abo cu tur bo famia den cas”.
Na juni aña pasa, e persona aki a los tiro mortal riba Sayuri. Na momento di e sucedido, ambos acusado tabata menor di edad. Esaki ta cambia henter e caso, pasobra e pregunta ta si lo trata e acusadonan como menor di edad of como adulto. Esaki ta e preocupacion di e tata di e hoben victima, e conocido Mike Petronia. Ley ta bisa cu, menornan di edad cu comete e tipo di delitonan aki, ta haya Jeugd detentie. Diabierna awo lo tende si Ministerio Publico lo persigui e hobennan aki como mucha of como adulto. E diferencia ta e castigo cu e por pidi pa nan, pasobra como adulto lo ta hopi mas, cu como mucha.
