Awe tardi pa mas of menos 2:30pm polis a presenta na un cas den Edisonstraat pa atende cu un situacion fastioso entre habitantenan di e cas y Guarda Nos Costa, cu a presenta pa busca dos mucha menor di edad. Esaki ta pa motibo cu mama di e muchanan ta ilegal y ta cera na Guarda Nos Costa.
Polis a papia cu e señora riba e situacion aki. E muchanan tabata keda na un instancia na momento cu a detene e mama. Pa un motibo of otro un amiga di e mama a busca e muchanan y bay cu nan su cas. Esaki a pone cu Guarda Nos Costa a bay busca e muchanan y pa hiba nan bek na un instancia di gobierno.
E señora a splica tanto polis como Guarda Nos Costa cu e muchanan kier sali for di e cas y no kier bay keda na un instancia di gobierno. A pidi asistencia di slachtofferhulp pa bin papia cu e muchanan. Nan a bisa di ta spanta pa bay na e instancia. Despues di un ora largo di a papia cu e señora y muchanan, a logra di bay cu e muchanan y hiba nan na un instancia di gobierno.
