A pesar di problema chikito: Eleccion di Reina Infantil y Hubenil a desplega un show di talento
E dos representantenan di Noord cu a domina escenario diasabra anochi durante eleccion di Reina Infantil y Hubenil di Aruba su carnaval tabata domina pa nan emocionnan di alegria cu e resultado. E anochi a bay tremendo, segun presidente di SMAC, Darren van Ommeren, a pesar di e problema chikito na inicio di anochi cu e vestuario di e candidatonan.
E evento mes tabata programa pa inicia 6:00 pm debi cu Entertainment Center ta den un zona residencial y no ta permiti zonido duro despues di mey anochi. Esaki ta algo cu ta data for di masha hopi aña pasa.
E time-limit lo no mester tabata un problema cu e cantidad di candidatanan cu a participa, sinembargo un cambio den e evento, cu a pone cu candidata di EPI no por a participa, a trece problema organisatorio. A dicidi cu e aña’ki pa e presentacion inicial, cu ta e show di apertura, tur candidata tin e mesun trahe. Como cu no por a duna midi di e candidata di EPI na december, a resulta cu e no por a participa den e eleccion.
Pero a resulta cu a surgi un “problema chikito” y e trahenan a yega Entertainment laat, segun Darren van Ommeren.
Presidente di SMAC tabata contento cu e anochi. “Nos tabatin un contratiempo chikito na inicio. Nos tabatin un problema chikito cu cosedo pero e anochi a bay tremendo cu bunita show y espectaculo. E diseño di escenario tabata tremendo danki na Brian Solognier y HP pa e trabou realisa.”
Cada participante a duna un tremendo show, el a bisa.
Pa loke ta e problema di trahenan, el a bisa cu a tuma accion mesora pa yega na un solucion. “Pero esaki ta cosnan cu por pasa.” E mashin di cose di e persona encarga a kibra y mester a busca un otro. Na final a busca mas cosedo pa finalisa e trabou mas lihe posibel.
Por a tuma nota tambe di presencia di Minister di Cultura, Xiomara Maduro, kende a keda te ultimo momento di e eleccion y a brinda su apoyo na organisadonan. “Tin biaha tin cosnan ta pasa cu bo no por evita,” el a bisa.
E mandatario ta un amante di carnaval y un fiel participante.
Minister Maduro a keda impresiona pa e cantidad di talento desplega riba escenario. No solamente pa nan presentacion y discursonan, pero tambe pa e show cu cada uno a presenta. “E shownan bunita y nan alegria ta loke a pone ambiente unico den Entertainment Center. Un gradicimento na cada un cu a participa y felicitacion na esunnan cu a participa y a gana. Pero tambe tur esunnan cu a apoya nan.”
Carnaval por tin su cosnan (red: problemanan) pero nos tur ta yega na solucionnan pa corda bek cu hopi alegria riba e di 70 celebracion di Aruba su carnaval.
REINA INTANFIL Y HUBENIL
Aunke cu e anochi a cuminsa laat y a wordo menciona cu tin hopi tension, no por a sinti esaki momento cu e candidatanan a subi escenario.
Mester bisa cu e anochi y e show, despues cu a soluciona e problema inicial, tabata un espectaculo di kita sombre pa cual tur esunnan cu ta tras di cada un di e shownan aki merece respet y elogio. E ta demostra e talento grandi cu Aruba tin.
Na final di anochi ta un candidata, den cada categoria por bay cu e maximo premio. Den Infantil mester bisa cu e candidata di Noord a sobresali for di momento cu el a subi escenario cu un energia abundante. Esaki a keda demostra tambe den resultado final unda Xeena Dijkhoff a bay cu diferente premio, ademas di esun di Reina Infantil di Aruba su carnaval. E otro premionan cu el a gana tabata: E candidata mas popular; miho speech y miho trahe carnavalesco. “Mi ta hopi contento y mi kier a gradici mi mama y tata, y tur otro cu a yuda mi cu mi speech”, cu lagrima coriendo riba su cara Xeena a expresa di e forma aki su alegria.
Den su emocion Jaylienne Tromp di Infinity Carnival Group (Districto di Noord) no por corda cuanto premio el a bay cu ne diasabra anochi. Ademas di e maximo titulo di e di 59 Reina Hubenil di Aruba su carnaval, el a haya premio pa e Miho Show y Miho Trahe Carnavalesco.
E hobencita tabata masha gradici cu su famia y team cu a haci tur cos pa “make my dream come true”.
Awe nochi lo tin e dos ultimo Reinanan cu lo bira conoci: Reina Grandi di Aruba su Carnaval y Señora Carnaval.
Resultado
Popular Children Carnival Queen 2024:
Xeena Dijkhoff – Districto di Noord
Best Speech Children Carnival Queen 2024:
Xeena Dijkhoff – Districto di Noord
Best Show Children Carnival Queen 2024:
Ciara Winterdaal – Don Flip Carnival Group
Best Carnival Dress Children Carnival Queen 2024:
Xeena Dijkhoff – Districto di Noord
3rd Runner up Children Carnival Queen 2024:
Adelyne Thiel – Little Diamonds Carnival Group
2nd Runner up Children Carnival Queen 2024:
Savannah De Lisle – Champagne Kids Carnival Group – Districto di Paradera
1st Runner up Children Carnival Queen 2024:
Ciara Winterdaal – Don Flip Carnival Group
47th Aruba Carnival Queen 2024:
Xeena Dijkhoff – Districto di Noord
59th Aruba Youth Carnival Queen Carnaval
Popular Youth Carnival Queen 2024:
Aliyah Ridderstap – Colegio San Antonio – Dushi Carnival Group
Best Speech Youth Carnival Queen 2024:
Guizza Steenvoorde – TOB Carnival Group – Colegio Arubano
Best Show Youth Carnival Queen 2024:
Jaylienne Tromp – Infinity Carnival Group – Districto di Noord
Best Carnival Dress Youth Carnival Queen 2024:
Jaylienne Tromp – Infinity Carnival Group – Districto di Noord
3rd Runner Up Youth Carnival Queen 2024:
Guizza Steenvoorde – TOB Carnival Group – Colegio Arubano
2nd Runner Up Youth Carnival Queen 2024:
Jaidyleen Tromp – Champagne Carnival Group – NTG Dancers
1st Runner Up Youth Carnival Queen 2024:
Joleimar Morillo – Kiwanis Builders Club Mon Plaisir College – Empire Carnival Group
59th Aruba Youth Carnival Queen 2024:
Jaylienne Tromp – Infinity Carnival Group – Districto di Noord
Pabien Noord y pabien Aruba.