Prome minister Evelyn Wever-Croes a contesta varios pregunta cu comunidad ta haciendo, manera ki dia lo bay persigui esnan cu ta responsabel pa loke nos tin cu bay paga awor aki, papiando aki di ex gobernantenan di AVP. E investigacion ta sigui. Segun prome minister, tin varios investigacion andando riba diferente tereno. Pero un guera canta, ta un guera perdi, en particular ora di papia di investigacion. Mester ta prudente, pasobra e por wordo perdi completamente.
Ta papiando di investigacionnan administrativo door di e boardnan di e diferente NVnan di directornan nobo. Una bes cu ta asina leu, lo entrega esaki na Ministerio Publico, pa mira si tin un caso penal cu nan por investiga y pa sigui cun’e. Sino e ta bay den e direccion pa esnan cu ta responsabel. Sino e wordo poni responsabel civilmente y tin cu traha riba dje.
E prome minister ta agrega cu e no por bisa si tin hende ta bay cera. Pero si e por bisa cu cosnan asina cu tin cu haci nan bon, ta tuma tempo. Un investigacion asina no por haci’e pura pura, pasobra e no ta sali bon. Pero gobernacion kiermen wak dilanti. No por goberna ta wak dilanti y cada biaha ta wak den spiel patras. E ora bo ta boks.
Pero esey no kiermen cu esnan cu a abusa, tin cu sali liber. Definitivamente cu no. Loke prome minister ta pidi ta pa tin poco pasenshi y fe, cu nan ta haciendo nan trabao. Mes momento cu nan ta drenta pa atende cu tur e crisis cu nan a haya, awor aki ta pasando door di e crisis. Ta mirando cu vision pa futuro p’adilanti y naturalmente tin hende cu leu leu ta wak den e spiel di patras, pa percura cu esnan cu realmente a abusa di e pais aki, ta carga ann responsabilidad. E enfoke ta pa wak padilanti. Awor aki a hit rock bottom. Si awor aki no keda wak p’adilanti, ta keda abao na suela, manera cu nan a laga nos. Gobierno ta nenga pa haci esey. A drenta den gobierno pa trece un cambio. Pueblo a pone confiansa den nan como coalicion pa trece cambio. Tin e vision, tin e determinacion, ta demostra cu nan tin hasta e curashi pa tuma e decisionnan cu mester wordo tuma y awo padilanti ta cosnan positivo so lo bin pa Aruba.
E bon ta cu apesar di tur e austeridad, apesar di e dolor, apesar cu e crisisheffing aki no ta facil, e ta duro, e ta bay afecta esnan mas vulnerabel cu danki Dios por a bin cu un compensacion toch, maske ta un tiki. Apesar di tur esey, den e presupuesto por bay atende cu e plan social, pone mas trahado social na trabao, duna e trahadonan social mas material pa nan por traha. Bureau leerplicht lo bay haya mas atencion, Voogdijraad, Bureau Sostenimi, pa asina evita loke cu a wordo confronta cun’e na November aña pasa cu e morto di e angelitonan Rishandroh y Eugene.
Na mes momento tin un plan di infrastructura. Gobierno ta bay inverti den e terenonan cu tin pa reparti, pa midi nan y otorganan. Awo tin hobennan cu kier traha cas, pero no por haya tereno. Nan ta biba na cas di nan famianan, etc. Algun ta biba hunto den un cas. Den presupuesto tin e inversionnan necesario pa por otorga e terenonan, pa hendenan por construi nan cas. Kier otorga 1000 tereno por lo menos. Pa asina 1000 famia por haya e chens pa construi nan cas y forma nan hogar. Den e 1000 aki ta bay tin 200 cu ta vivienda social, cu ta sumamente urgente na Aruba, pasobra no a traha vivienda social pa 8 aña. Den e presupuesto aki tin tambe pa haci Aruba mas sigur, inversionnan den tecnologia mas moderno manera drone, radar, lo bay tin mas auto pa polis, algo cu tabata hopi necesario den e ultimo añanan.
E presupuesto tin su parti di austeridad, pero tambe nan tin e parti unda cu por trece alivio y atencion na e problemanan mas urgente di nos pais.
