Awe ta dia 3 di e tratamento di presupuesto y tin riba agenda pa aparece entre otro minister Endy Croes di enseñansa y deporte. P’e motibo aki mes, mirando cu ta toca e cartera di enseñansa, varios werkster a dicidi cera cabes y bin parlamento pa asina mustra cu nan t’ey y nan ta na luto. Na luto pasobra nan no sa kico lo para di nan dia di mañan.
E werksternan a presenta cu un serie di carta haci grandi unda cu a mustra cu supuestamente e minister lo a bay haci algo pa por remedia e situacion cu e werksternan aden.Secretario general di sindicato SEPPA, Magaly Brito hunto cu Josephine Albertus, presidente di sindicato SIMAR, tabat’ey presente pa asina brinda nan sosten n’e trahadonan aki.
Brito a comenta cu lastimamente e grupo di trahado aki ainda no tin claridad kico t’e posibel solucionnan pa loke t’e situacion cu a bin ta luchando p’e desde final di 2019 caba.
Berdad tabatin varios encuentro cu e minister, kende a bin ta indica tur loke el a bin ta haci. Pero p’e grupo di trahado aki ta bay cu for di momento cu gobierno a bisa cu den 30 dia lo tin resultado di un trabao di un comision, cual a tarda. Durante tratamento di presupuesto di enseñansa ta tuma luga awe y te ainda e werksternan no tin claridad kico lo bay sosode.
Josephine Albertus, presidente di SIMAR a comenta di su banda cu ta mas cu claro cu ora un hende yega na pia di trabao, un hende laborando den veld di enseñansa, of un hende cu ta forma parti di enseñansa yega scol, e kier scol duna les of haya les den un edificio limpi, den un local higienico p’asina sa cu ta teniendo cuenta cu e salud, bienestar y siguridad.
Aki por mira cu cada trahado, no solamente den veld di enseñansa, pero unda cu ta, tin e derecho pa tin claridad riba su posicion huridico.
Tin werkster cu a pesar cu nan no tin claridad, a pesar cu nan tin tanto luna caba sin tin informacion of sin tin aporte na nan pensioen, na nan AZV y loonbelasting, nan ta cumpli tur dia.
Marina Valdivia a papia pa tur e werksternan y a remarca cu nan no tin un stabilidad laboral. Nan ta traha den incertidumbre tur dia. No sa si p’e fin di luna aki nan a cobra. Algun di e werksternan no tin AZV y tin otro tin yiu chikito. No ta un ambiente agradabel pa traha y nan no ta contento. Nan ta bay traha tur dia, cumpli cu nan orario di trabao y nan funcion encarga. Nan ta contento cu nan tin trabao, pero no contento pasobra nan no sa kico ta bay pasa cu nan. A warda pa un minister nobo, pero lamentablemente no tin nada concreto. P’esey nan a presenta dilanti parlamento, cu sosten di sindicato SEPPA y SIMAR, pa wak kico ta bay pasa cu nan.
Valdivia: “Un scol sin limpiesa, no ta draai. Higiena ta parti importante di un dia normal di e estudio di e muchanan.”
Pa mayor cobertura lesa TREMPAN.
