Diaranson 14 di september wega number 32 di e aña aki tabata riba programa. Den un duelo special y hopi amistoso cu un toke internacional SV Mercurius a gana cu 2-1 di Titanes FC.
Goleadornan di Mercurius tabata Alfredo y Goyo. Den bispo di aniversario di su 72 aña di existencia (15 di september 1950), SV Mercurius tabata anfrition den stadion Guillermo Prospero Trinidad di e prome di dos wega internacional contra Titanes FC. Algun ex-hungado di Titanes FC a representa e seleccion Colombiano.
E fanaticonan di ambos ekipo riba tribuna a wak cu e prome 20 minuut e teamnan tabata buscando oportunidad sin yega na un atento di gol. E prome oprtunidad real tabata crea door di number 9 di Titanes FC pero su tiro a sali mucho halto.
Despues di e momento aki Mercurius a cuminsa hunga miho y a tuma mas iniciativa. Un bon wega posicional y poniendo presion a resulta den algun oportunidad.
A anula un gol di Camilo pa un falta contra e keeper di Titanes FC den e area di 5 meter. Despues Goyo y Flaco a encontra e portero y e palo di gol ta stroba nan pa anota e prome gol di wega. E prome mitad a caba cu e score di 0-0.
Den e di dos mita, un biaha mas ambos team a haci uzo e e posibilidad cambia hungado continuamente. Despues di 15 minuut Mercurius a tuma bentaha di 1-0. Un ataca cu a cuminsa cerca e keeper di Mercurius a bay via varios hungado y finalmente a duna Alfredo e chens di anota un gol a base di un assist di Flaco. Titanes a purba di bolbe tuma e initiativa, pero Mercurius a wanta bon.
Despues di mey ora den e di dos mita, Mercurius a anota 2-0. E biaha aki un ataca bon planea cu assist di Harm corona door di Goyo. A forsa Titanes pa hunga mas ofensivo. Esey a resulta den algun chens pa nan, pero tambe a duna mas espacio den nan defensa.
Ocho minuut prome cu e ultimo señal di arbitro, Titanes a bolbe bek den e partido. Despues di un falta den area penal di parti di Mercurius, Titanes a ricibi un penalty. Portero Dennis a logra di para e tiro penal den prome instante, pero el a keda sin oportunidad den e rebound.
Despues di e gol di conexion, ambos team a ricibi algun oportunidad. Sinembargo, e publico presente mester a confirma su mes cu 3 gol. Pero husgando e reacionnan despues di e wega nan a keda satisfecho cu e wega.
Diasabra venidero lo tin e rematch riba veld di Mercurius.
