Tur cos ta cla pa e segundo edicion di e festival di cine di Playa. E aña aki fundacion CINEARUBA a prepara un progama amplio yena cu tayer, masterclass, pelicula y sesion di network. E festival di cine lo tuma luga durante e vacacion escolar di october cuminsando riba diahuebs 6 di october te cu diadomingo 9 di october na Ateliers ’89 situa na dominicanessenstraat 34, net schuin tegenover di Maria College Mavo.
Tur e peliculanan cu ta participando e aña aki den Playa Film Festival a pasa door di un evaluacion prome cu nan a bira e seleccion oficial. Un proceso cu a inicia riba 28 di januari di e aña aki pa medio di un ‘film submission’ unda cu a cuminsa ricibi peliculanan for di tur parti di mundo. Dia 15 di augustus e posibilidad pa entrega pelicula a cera y a pasa pa evalua tur e peliculanan ricibi.
E prome anochi di e festival lo inicia cu e apertura di un exposicion di cine basa riba e trabaonan cinematografico di e cineasta Juan Francisco Pardo kende e aña aki ta cumpli 30 aña como creador di contenido. E bishitantenan lo por experiencia diferente instalacionnan di arte inspira riba e storianan di cada un di e peliculanan di Pardo.
E nochi ta sigui cu e documentario ‘New light – the Rijksmuseum and slavery’ di e cineasta Ida Does, Hulanda. E otro peliculanan cu tambe lo presenta riba e prome anochi ta ‘Rasha’ di Melissa Strangio, Hulanda y ‘The last resource’ di Kaylee Reeberg hunto cu Juan David Villar, Aruba.
E di dos dia di e festival lo inica cu e masterclass di ‘Script breakdown’ unda cu e participantenan lo siña con pa break down un script den rekisitonan di produccion. Lo sigui cu e masterclass di ‘Production schedule’ cu ta enfoca riba programacion di talentonan, ekipo humano y localidadnan. Atardi lo tin tayernan pa mucha cu ta ‘Foley sound effect’ cu ta siña muchanan di 7 pa 12 aña con ta traha efectonan di zonido pa un pelicula. Un otro tayer pa mucha ta di ‘Play doh stop motion’ aki lo traha un pelicula uzando play doh.
E peliculanan pa e di dos dia ta ‘You and what army’ di Jim Menza, USA, ‘Dande di Aruba’ di Cindy Kerseborn, Aruba, ‘Why we are unhappy in cities’ di Zhao Gang, China, ‘Beyond marks’ di Leticia Lopez, Brazil, ‘Donna’ di Sonia Commandeur, Hulanda, ‘Online crush’ di Ronney Dotel, Aruba.
E di tres dia lo tin ‘Film language’ masterclass cu ta ofrece un bista riba e nombernan tecnico y e nificacion di cada imagen of escena den pelicula. Pardo lo bay conduci un masterclass unda e lo combersa riba e formula di cine cu e ta uza pa wanta e costonan abao.
Pa e muchanan lo tin un ‘Green screen acting’ tayer unda cu e muchanan lo explora y actua dilanti un green screen.
E peliculanan pa e di tres dia ta ‘Opal’ di Alan Bidard, Martinique, ‘Malpelo mountain of shark’ di Kevin Mannens, USA, ‘The greatest of all Tina’ di Brody Gusar, USA, ‘The sands of time’ di James Hughes, UK, ‘Perspektiva’ di Rovendley Welvaart, Curacao.
E ultimo dia di e festival lo tin ripiticion di diferente masterclass, tayer y pelicula. E anochi di diadomingo nuebe di october lo anuncia e ganado di pelicula cortico y pelicula largo. E publico ta esun responsabel pa vota pa nan peliculanan faborito pa asina por selecciona e peliculanan ganado di e festival di cine di Playa.
Ticketnan ta obtenibel online via www.playafilmfestival.com y tur ticket ta fungi como un ‘day-ticket’ cu ta duna e publico acceso riba tur e actividadnan durante ful e dia riba e dia cu nan cumpra e ticket. E contribucion di e publico pa medio di cumpra un ticket lo yuda fundacion CINEARUBA cu tur otro proyectonan cu ta enfoca riba desaroyo artistico y personal di muchanan y hobenan.Playa Film Festival no tabata posibel sin e sosten di Prins Bernhard Cultuurfonds Caribisch Gebied, Setar N.V., Ateliers ’89 y Smart and Fast Cargo. Pa mas informacion bishita www.playafilmfestival.com.
