Diabierna ultimo e Centro Operacional Maritimo (MOC) di Wardacosta, a ricibi un notificacion cu un persona cu lo a huur un jetski na Aruba, un turista hende homber, lo ta perdi riba lama. MOC mesora despues di e notificacion a dirigi e avion di Wardacosta, e helicopter di Wardacosta y un Metal Shark pa e sitio caminda e persona y e jetski por tawata.
Unidadnan di Wardacosta hunto cu e helicopter di Cuerpo Policial Aruba a busca e homber y e jetski te diabierna parti anochi, sin resultado positivo.
Henter fin siman wardacosta a laga su unidadnan di buelo y un boto di patruya haci e buskeda di e homber y jetski. A base di un plan di buskeda y rescate y un asina yama ‘search box’ riba lama, unidadnan di wardacosta a sigui cu e buskeda. Tambe a manda un informacion di Navtex pa botonan den e area cu e mensahe cu ta buscando un homber perdi y un jetski, cu e peticion pa botonan tira un bista riba lama.
Wardacosta te cu diadomingo atardi no a localisa e homber ni e jetski y e dianan benidero lo mantene vigilancia riba lama pa cu e homber y lo keda monitoria e situacion.
