Diadomingo, dia 27 di februari 2022, dokter Vincent Latour, actualmente jeugd arts na Departamento Di Salud Publico (DVG), a bay Hulanda pa specialisa como medico forensico pa Aruba. E posibilidad pa e specialismo aki a wordo realisa door di DVG den colaboracion cu Ministerio di Asuntonan General, Departamento di Recurso Humano, Family Justice Center (FJC) y NSPOH (Netherlands School of Public & Occupational Health). Despues di varios aña sin un propio medico forensico porfin Aruba lo yega na su prome propio medico forensico. E medico forensico su tarea principal ta pa asisti mastanto den investigacion forensico di abuso sexual y violencia relacional severo. Esaki lo fortifica e parti di sporenonderzoek y lo fortifica tambe e colaboracion entre varios instancia, entre otro Jeugd- en Zedenpolitie (JZP), Cuerpo Policial (KPA), Horacio Oduber Hospital, Directie Voogdijraad, Directie Sociale Zaken, Bureau Sostenemi, Openbare Ministerie, Veiligheidshuis y mas partners.
Desde cuminsamento di aña 2021, DVG y FJC a inicia e contacto cu NSPOH y a sondea e posibilidadnan pa un candidato di Aruba por sigui e estudio pa medico forensico. Despues di a ricibi un contesta positivo, DVG a publica un vacatura via diferente canal di media na Aruba y tambe via Arubahuis. E vacatura a indica e tareanan di un medico forensico y tambe e condicionnan cu e candidato lo mester cumpli cu ne.
DVG a ricibi un total di 4 solicitud riba e vacatura, di cual solamente un candidato por a cumpli cu e condicionnan stipula pa NSPOH. Despues di a ricibi e solicitud, NSPOH a tene un sollicitatiegesprek y despues a duna aprobacion na e candidato. Ora DVG a ricibi e aprobacion di NSPOH, DVG na su turno a manda un peticion oficial na conseho di minister, mirando cu e estudio lo tuma luga den cuadro di un studieopdracht. Conseho di Minister a bay di acuerdo cu esaki, teniendo cuenta cu e richtlijnen di Departamento di Recurso Humano. Despues di e procedura aki por bisa oficialmente cu dokter Vincent Latour ta e candidato selecta pa sigui e specialismo di medico forensico.
Na Hulanda, dokter Latour a traha den diferente area di experticio, manera cuido multidisciplinario den hospital, den area di doctor di cas y tambe den area di verloskunde. Desde 2016 dokter Latour ta biba na Aruba y a cuminsa traha na JGZ como jeugdarts. Desde februari 2021, dokter Latour ta funcionando como doctor di confiansa na Bureau Sostenemi. Prome cu su despedida diadomingo pasa, dokter Latour a gradici tur profesional cu a haci esaki posibel y specialmente su casa, cu a sigui dun’e motivacion pa haci esaki. Durante e siguiente dos aña y mey, dokter Latour lo sigui e specialismo aki mastanto na Hulanda y lo sigur haya falta di su casa y 4 yiu na Aruba.
E logro pa yega na un medico forensico ta un paso importante pa Aruba. Na e mesun momento DVG y FJC ta conciente cu mester busca otro solucion pa e siguiente temporada nos dilanti tanten cu nos no tin nos propio medico forensico na Aruba. Actualmente DVG y FJC ta trata di yega na un areglo cu NSPOH.
E proyecto Family Justice Center ta un proyecto nobo na unda e instancianan hudicial y instancianan di ayudo social lo traha mas hopi posibel bou di un solo dak y den algun caso hopi mas cerca di otro. Hunto lo duna servicio mas completo posibel na e victimanan di abuso sexual y violencia relacional fisico severo. Un danki ta bay specialmente na e Ministerionan cu a haci esaki posibel, cual ta Minister di Asuntonan General, Innovacion, Organisacion Gubernamental, Infraestructura y Planificacion Territorial mr. Evelyna Wever- Croes, Minister di Husticia y Asuntonan Social Rocco G. Tjon y Minister di Turismo y Salud Publico Danguillaume P. Oduber.
