Antes e Centro di Control di Cacho tabata un kill cage, pero awo a cambi’e, por lo menos e nomber, pasobra na final e resultado ta mesun cos si e mascota no haya un doño nobo lihe. A expande e centro y tin un señora encarga cu ne. Un persona cu yega eynan cu su mascota indesea, mester yena un formulario bisando cu e ta distancia di dje. Asina aki e mascota por bay pa adopcion, pero door cu e doño mes a trec’e y e fundacionnan ta yen, probablemente lo “pone drumi”.
Cachonan haya riba caya door di Polis of un persona hay’e riba caminda y hib’e na e centro, e cachonan tin e derecho di keda eynan entre 3 te cu 10 dia, asina dr. Irene Croes, veterinario di Gobierno, a bisa. Esaki ta segun e ley di cacho y unda cu ta warda e doño bin reclam’e. Den ley e ta defini asina cu si e cacho tin un micro chip, e ta identifica, e tin derecho di warda e doño pa 10 dia. Si no tin micro chip ta warda 3 dia pa bin busk’e, fundacion por adopt’e y si esey no pasa lo pone e cacho drumi. Tur esaki ta pa motibo cu tin hopi cacho riba caya. E problema ta hopi grandi y tin hopi doño di cacho iresponsabel.
Den e ley di “hondenverordering” ta hinca cu ora un doño busca su cacho, e tin cu paga un suma di tanto dia e cacho a keda den e centro. Ta trata e “regeling” AB 2013 number 68 y den e articulo 4 ta indica precisamente kicolocual mester paga, cu ta 35 florin pa cuminsa y e lo bin acerca e gastonan di cuido pa dia cu e cacho a keda, cual tin un maximo. Esey ta ora un doño perde su cacho y bay busk’e na Centro di Control di Cacho.
E centro aki ta un semi shelter, unda e ta un centro di controla cacho y e populacion di cacho aki na Aruba. E lo fungi como shelter, lo warda e cachonan den un haula. P’esey tin e ampliacion, pa por saca e cachonan un rato y despues hinca nan bek den haula. Tur esaki ta necesario pa mantene e luga limpi, ta duna e cachonan cuminda, brinda nan cuido y baño. E centro ta limita pasobra tin 12 haula, aunke cu e ta tiki mirando cu e problema ta grandi, pero ta cuminsa chikito y na caminda lo mira si mester adapta of crea un luga mas grandi.
