Ta for di atardi caba cu e plataforma di pago electronico di Aruba Bank ta “down”. Consecuentemente, cliente no por lanta placa di nan cuenta via ATM, otronan no por paga na ningun mashin POS, mientras cu transaccionnan tambe no ta pasa. Den cierto forma, bo tin placa riba bo cuenta, pero no por haci nada toch.
Specialmente na stacionnan di gasolin a nota problema ora di paga pasobra a yena e tanki caba pero ora mester paga, ta resulta cu carchi no ta pasa, pero ora baha bay lanta placa paden tampoco. Den otro negoshinan tambe clientenan a haya nan mes confronta cu no por realisa pago.
Update: Den oranan laat di anochi, a restaura e servicionan online bek.
Mester menciona cu aña pasa caba, na october, e banco a hay’e den un scual pisa ora cu algun cuenta tabata comprometi. Mester a cambia hopi carchi di cliente. A bisa e tempo ey cu ta un desaroyo mundial y cu ningun cliente a perde placa pasobra e sistema di siguridad a activa, djis cu tabatin inconveniencia.
Awe e banco mas bieu di Aruba a garantisa cu no tin problema cu cuenta comprometi pero cu nan ta actualisando nan sistemanan y algo a bay robes pero cu nan ta trahando duro riba dje. Berdad e ta un inconveniencia pa cliente pero ningun hende a perde placa. Aruba Bank a sigura cu nan sistema ta confiabel pero cu aspectonan tecnico a faya pa cual clientenan no por a haci transaccion. Nan no por a duna un orario ki ora e sistema lo ta operacional atrobe. Ora bo ta e banco mas grandi, ora di problema, automaticamente e ta bira un reto “grandi” tambe y e inconveniencia ta afecta miles di hende.
Aruba Bank ta e banco comercial mas grandi di Aruba, cu riba 2 biyon florin na activo. El a nace na Aruba na aña 1925 como John G. Eman Banking Department. Shete aña despues el a bira John G. Eman Bank N.V. y desde aña 1936, despues di a uni cu un otro banco, a forma hunto loke nos conoce awe como Aruba Bank. Nan tin un total di tres sucursal na Aruba, cu mas di 30 mashin di ATM y cu riba 260 empleado. Na october 2003, Aruba Bank a cumpra e accionnan di Interbank Aruba N.V. y na februari 2005 a cumpra OHRA Hypotheekbank. Mester menciona cu Orco Group, un compania estableci na Corsou, ta doño di Aruba Bank. Nan tin acuerdo y ta traha hunto cu varios banco internacional, manera Wells Fargo na Miami, ING Bank na Belgica y Bank of America na Merca.
