Diasabra, diferente club social di Aruba a uni forsa pa ehecuta un proyecto importante di mantencion y mehoracion na Ambiente Feliz, un institucion cu ta brinda atencion na persona cu necesidad soecial. E iniciativa aki, segun Rubi Ponson, presidente di Aruba Lions Club y lider di e grupo Interclub, a reuni e miembronan di ocho organisacion diferente, incluyendo Kiwanis, Rotary, Women’s Club, Quota y Lions Club.
Ponson a splica cu e proyecto aki parti di e colaboracion di Interclub, tabatin como obhetivo principal verf, drecha y suministra e recursonan necesario na Ambiente Feliz. “Nos a propone cumpli cu varios meta awe,” ta loke el a bisa. E prome tabata pa reuni tur e miembronan boluntario di e clubnan pa traha hunto. E di dos tabata pa completa e mehoracion den un solo dia. Cu mas di shen boluntario cu a registra, di cual cerca di cincuenta tabata activo n’e sitio, e proyecto a avansa riba un bon ritmo.
E proyecto di Interclub no ta nobo, ya cu e organisacinnan a yega di colabora den diferente iniciativa hopi aña pasa, pero e biaha aki, a enfoca riba un obhetivo comun mas tangibel y visibel pa comunidad. “E comunidad mester mira cu hunto, nos por logra hopi y lihe,” Ponson a añadi.
Fuera di esey el a destaca e importancia di e actividadnan di recaudacion di fondo cu cada club ta realisa, subrayando cu e fondonan obteni ta destina na proyecto manera esaki, cu tin un impacto directo y positivo den e comunidad.
E esfurso conhunto aki no solamente a mehora e instalacionnan di Ambiente Feliz, sino cu tambe a demostra e poder di colaboracion entre e diferente organisacionnan na beneficio di comunidad. “Nos ta spera cu e iniciativa aki sirbi como ehempel y motiva mas hende uni y sostene causa similar,” Ponson a conclui.
E dia tabata un exito y a refleha e compromiso di e clubnan social di Aruba cu e comunidad, destacando cu, uni, por alcansa logro grandi y brinda sosten unda cu mas tin mester.
