Despues cu Gobierno a tuma e decision pa cera scolnan mas trempan y implementa e medidanan mas severo pa e dos simannan, a dicidi cu ta un bon momento pa percura cu tur maestro den enseñansa por vacuna. Cu 1 dosis ya un persona ta protegi pa 75% y p’esey a pensa cu esaki ta un bon periodo pa enfoca pa maestronan haya e oportunidad aki. Pa por a logra esaki a acerca SIMAR, SKOA y diferente schoolbestuur, cu a aporta pa tene un accion di vacunacion diasabra ultimo.
“Mi ta gradici maestro y maestranan cu a bay vacuna. Esaki ta haci mi contento. Mi no ta Minister di Enseñansa, pero mi tin enseñansa cerca di mi curason y mi sa cu si maestronan vacuna tin mas chens cu scolnan ta sigui sin interupcion despues di vakantie”, asina Prome Minister demisionario, mr. Evelyn Wever-Croes a duna di conoce.
E minister presidente demisionario a gradici e rol di e organisacionnan aki pa por a yega na e maestronan pa por vacuna nan den e periodo aki. Cu e paso aki sigur e lo yuda Aruba pa evita mas problema, pasobra si maestronan ta protegi, por garantisa continuidad di enseñansa. Esaki ta hopi importante considerando e cantidad di les cu studiantenan a perde den transcurso di e ultimo aña aki, cada biaha cu cera scol y/of door di cuarentena.
Na e momentonan aki Aruba tin 20 mil hende cu a haya vacuna. Esaki kiermen cu tin 20 mil hende cu ta por lo menos 75% protegi. Y tin 38 mil persona cu a registra caba pa vacuna. Banda di esaki lo haya 12 mil vacuna extra di Hulanda cual no tabata planifica, pero ta netamente door di e cantidad di hende registra, cu esaki a bira posibel.
Prome minister demosionario a haci un apelacion riba tur hende pa por fabor registra pa vacuna, mientras cu tin mas registro ta drenta, mas vacuna lo drenta. Tur esunnan cu a registra te cu e siman aki, dentro di dos siman nan lo ricibi nan vacuna pasobra tin suficiente y asina lo caba tambe cu e lista di espera cu tin.
Ta gradici SIMAR, SKOA y tur otro schoolbestuur y specialmente maestronan cu a vacuna. E unico manera pa nos sali for di e crisis y efecto devastador di e crisis aki na Aruba ta door di vacuna nos mes. Un noticia sumamente importante cu a sali na cla ta cu asina un persona ta vacuna e no por transmiti e virus mas pa otro hende, esaki ta comproba y pues consecuentemente lo bay evalua pa esunnan cu ta vacuna ya no mester test ora di drenta un pais.
“Awor aki ta memey di dos siman for di cual a detecta como momento critico, awor como Aruba nos por demostra si como pueblo tin e madures y responsabilidad pa domina e pandemia no. Si nos sigui cu aglomeracion y actitud iresponsabel nos lo perde e bataya y no kier pa pasa locual cu ta pasando na hermana isla Corsou”.
Pa conclui minister-president demosionario Evelyn Wever-Croes a haci apelacion na comunidad pa un siman mas, limita movecion mas cu ta posibel y registra pa vacuna pa no plama e virus. E ora ey pronto nos por bisa cu e pio ta tras di lomba!
