Medionan di comunicacion ta publica cu un “blunder nacional” a tuma luga ora informacion medico di personanan contagia a sali den publicidad. E minister a expresa su disgusto cu e susedido, pero den nos estado di derecho e minister encarga ta e “HOOFDELIJK AANSPRAKELIJK”, pues ta personalmente responsabel pa esaki. Ex minister di salud publico y lider di partido Union Patriotico Progresista (UPP) a condena e hecho aki riba su pagina di Facebook.
“DVG a laga sa cu lo bay haci un investigacion.
Pues en todo caso esaki no ta un fake-news! Ya caba tin basta critica y preocupacion pa e forma con ta maneha e pandemia. Den prensa ya a sugeri cu e minister a duna su tennis vriend e autorisacion pa haci test. Esaki a para bira un fiasco total y ningun musca a bula”, segun Booshi Wever.
E situacion financiero di nos pais ta desastroso y e unico entrada for di turismo ta core peliger pa un mal maneho.
“No mas. Minister mester tuma retiro su mes of parlamento mester cuminsa cumpli cu su trabou pa responsabilisa e minister”, asina Booshi Wever ta opina.
“Un parlamentaria (Sue-Ann Lacle-Ras) pa un acto mucho menos a tene honor na su mes y retira. Y si en berdad INTEGRIDAD ta un “SPEERPUNT” di gobierno anto e minister mester sigui e ehempel di e parlamentaria y per direct!”, asina Booshi Wever a termina bisando.
