Diaranson ultimo Universidad di Aruba a habri su portanan pa ricibi bishita di representante di diferente scol, cu e intencion pa tin un relacion mas fuerte, comparti informacion y reforsa nan colaboracion un cu otro.
Charisse Hoen-Daly coordinado na Universidad di Aruba a splica di ta contento cu e diferente scolnan a acudi n’e evento. Normalmente nan tin un opendag pa studiante pa nan sa e posibilidadnan kico Universidad di Aruba a brinda.
Sinembargo nan a dicidi pa invita e docentenan. Segun Hoen-Daly, e rector nobo, Viola Heutger hunto cu e mes, a bishita diferente scol pa duna informacion. E ora a ripara cu e docentenan tambe ta bisa cu nan tampoco no sa kico tur e cambionan ta of kier cera conoci mas cu e universidad.
Meta di e dia aki tabata en realidad pa por a comunica y conecta cu otro, pa por comparti informacion, mester di e conexion aki. Tabata hopi agradabel pa mira diferente combersacion cu nan tin.
Di parti di colegio EPI, Juliette Bomba-Hoftijzer, kende ta decano, docente y coordinado di unit Economia, ta splica cu e evento aki ta un bon iniciativa pasobra masha poco tin cooperacion. Hopi biaha ta e decanonan so ta topa cu otro.
Richella Wijngaarde, docente di economia na Colegio Arubano y alabes decano, tambe tabat’ey presente durante di e dia informativo aki organisa pa Universidad di Aruba.
E ta conta cu e encuentro tabata uno fantastico. Un luna pasa Colegio a haya e invitacion y a sugeri cu e lo haya ideal pa hunto cu e otro scolnan ta hunto pa asina intercambia di idea, informacion, etc. Pa sorpresa di Wijngaarde a tuma e idea aki na consideracion. E ora nan a bin na un atardi hunto, unda cu nan a haya e informacionnan valioso. Como decano (conseheronan di estudio), el a comenta cu cada un di e facultadnan a haya chens pa nan duna informacion, nan ta hay’e, pa despues haci pregunta.
Pa un cobertura mas amplio lesa e edicion di TREMPAN di mañan.