E bendicion di un tata pa su yiu, tin gran balor, emocional, spiritual , y fisico. Bendicion no ta solamente material, pero tambe e tempo cu un tata ta dedica na su yuinan ta un tempo bendiciona.
Palabra di un tata tin efecto riba su yui, pesey un tata mester pensa prome cu e papia, pasobra como tata bo palabra por pone e mucha cohe direccion robes, pero tambe bo palabra y bo amor por trece e mucha bek riba e bon caminda.
E palabra tata ta nifica esun responsabel, esun cu a pone e simia pa e yiu por ta na mundo, esun cu tin un mandato di Dios pa cuida, cria, coregi, displina su yiu den amor y instruccion di Dios.
Un tata di criansa cu compronde bon kico e tin di haci, lo ta bendiciona, pasobra e a tuma e reponsabilidad caminda otro a corre bay,of por ta e persona a fayese , of a bandona famia .
Den e buki di Genesis Capitulo 27 vers 36 Esau a puntra Isaac su tata , Bo no a warda un bendicion pa mi? Y den versiculo 38 e ta bolbe bisa : Ta un bendicion so bo tin , mi tata? Bendicionami tambe O mi tata,Y Esau a halsa su bos y yora.
Kico ta nifica : Bendicion di tata?
Awel ta un mandato di Dios di hopi balor pa famia, caminda un tata cu un curazon limpi, deseando bienestar di su yiunan ta proclama y declara bendicion.
E ta bini for di un autoridad cu Dios a establece como cabez di cas, y nos tur sa cu bendicion semper ta corre for di cabes bay na pia.
E bendicion di tata , ta obra pa bon den bida di e yiu y haci e yiu , un persona cu respet pa su mes y otronan. Y mas cu tur cos un mucha cu ta respeta Dios.
Tin hopi tata no sa cu nan tin di bendiciona nan yiu, tin hopi ta kere cu esey ta deber di e mama, tin hopi tata ta kere cu cria yiu so ta suficiente, pasobra den e cas cu nan a lanta nan mayornan nunca a bendiciona nan.
Awor cu nos ta mira cuanto cos ta sosode cu hubentud, nos ta ripara cuanto falta e amor y bendicion di tata ta haci den hopi hogar. Hopi di nos ta pensa cu e situacion ta asina door cu e mucha ta bini di un famia di menos recurso of di un mama soltero, pero esey ta nifica cu e mucha tin un tata.
Un conseho na hopi tata , aunke bo no ta biba hunto cu mama di bo yiu, habri bo curazon y bo boca y bo bendiciona bo yiu, pa asina caminda bira lizo pa bo yiu cana.
Tin hopi tata culpabel di e situacion cu nan yiu ta den , pa nan falta di atencion, nan falta di amor, iresponsabel , y nan a lubida e mandato di Dios pa nan famia.
Un tata mester bendiciona su yiu.
