Diasabra otro siman, dia 24 di juni, e Venezolano Maickel Melamed, ta bay duna un charla na alrededor di 400 persona den I-MAX na Gloria. E charla ta hiba nomber di “The Most Extreme Challenge Of Our Lives- Rappel Angel Falls with Maickel Melamed”.
Comunidad di Aruba tin e oportunidad di scucha un storia unico. Un storia pa motiva y inspira, mirando cu e storia ta bin fo’i un hende cu nunca a stop di kere den su mes y a mustra cu tur hende por haci lo posibel pa logra loke ta desea. Cantidad di espacio ta limita, inscribi awe mes:
TOCANTE GLORIA
A habri “Gloria – Movies Dining Entertainment & Play” na december 2020, den pleno pandemia. Ta trata aki di un inversion grandi, di no menos cu 40 miyon florin, den un compleho di pelicula, cuminda y bebida y entretenimento. A yam’e GLORIA como honor na e prome sala di cine cu famia de Veer a inicia cu ne hopi aña pasa. Den e edificio tin 10 auditorio di cine, parti den 1 sala IMAX, 3 sala VIP y 6 sala comfort class. Na tur tin 1.132 stoel ora tur e salanan ta yen. Claro cu e sala di mas grandi ta esun di IMAX, cu 284 stoel pa admira un pantaya di 71 pia hancho, casi similar na e tamaño di e pantaya di Drive In, cu ta 80 pia di hanchura.
E compleho aki ta encera hopi mas cu solamente cine riba pantaya grandi. A cera Aruba conoci cu P.F. Chang’s, un cushina Chines, Japones y Thailandes, capas pa carga 225 huesped. Na caminda a bin Olive Garden, cu a bira e sensacion di momento. A habri tambe cu Sizzle y un foodcourt cu ta inclui un Starbucks, Lettuce Eat y mas pa scoge for di dje. Tur esaki sin lubida riba e sala di mucha cu a haya e nomber di “Stay & Play” cu tur sorto di co’i hunga pa mucha, incluyendo un arcade pa weganan digital y electronico.
TOCANTE MAICKEL MELAMED
Maickel Melamed a nace dia 27 di april di aña 1975 na Caracas, Venezuela. E ta e di dos yiu di Maritza Trujillo y Alberto Melamed. Maickel ta un coredor riba distancia largo. Alabes e ta un motivador, consehero financiero, docente di filosofia y docente fisioterapia. Maickel ta co-fundado di De Alto Rendimiento DAR.
A pesar na momento cu el a nace e dokternan no a dun’e mucho tempo di bida cu masha exito Maickel Melamed a caba e New York City Marathon, Berlin Marathon, Chicago Marathon y e Boston Marathon. Ademas di core marathon, Melamed a subi e top di sero mas halto di Venezuela cu ta e Pico Bolivar.
