Den e conferencia di prensa cu a tuma luga awe mainta den cual a trata, entre otro, e topico di vacatura pa un altocomisario nobo den cuerpo policial, a puntra minister di husticia, Rocco Tjon, kico ta e procedura di dialogo pa esaki. Segun Tjon mas cu claro tin dialogo cu sindicato y tur otro ‘stakeholder’ concerni, pero cu na Aruba nos tin un Justitiële Veiligheidsraad den cual tur decision strategico ta tuma y e necesidad pa nombra un altocomisario tabata menciona den dicho plataforma.
Pa loke ta e nombramento di diferente korpschef ultimamente y e efecto cu esaki tin riba e funcion, Tjon a bisa cu pa tin stabilidad y pa tin un persona encarga cu e mando ta necesario pa nombra un persona pa un periodo di tres aña pa duna contenido na diferente punto strategico y ehecuta e proyectonan andando.
Na momento cu a puntr’e tocante Kock, ex-altocomisario, kende lo a retira temporalmente di e posicion pa despues bolbe eherce esaki si pa cualkier motibo algo pasa cu e gabinete, Tjon a bisa cu e gabinete aki ta uno solido y cu ta pa es motibo mes ta buscando un altocomisario pa un periodo di tres aña.
Den nombramento di un korpschef, mester tene na cuenta cu tin algun otro funcionario den e departamento aki cu tambe ta cay bou di e schaal 16 actualmente, pues ta cuestiona con esaki ta hinca den otro, specialmente den cuadro di e gastonan pa gobierno. Riba esaki, Tjon a splica cu gasto di personal ta algo cu e gabinete aki ta tuma hopi na serio y cu ta p’esey mes desde 2017 a baha esakinan y semper a cumpli cu tur e puntonan di Hulanda pa loke ta gasto di personal y cu nombramento di un korpschef nobo no lo bay trece cambio den esaki. Pues, segun Tjon tin varios ambtenaar cu ta cay den schaal 16.
