Camara di siguridad ta mustra claramente cu velocidad halto t’e motibo principal den accidente di ayera atardi. E accidente a sosode den Caya Boes Orman, conoci como Arendsstraat. Ta trata di un auto marca Nissan modelo March color blauw, numera A-74543. E tabata biniendo for di pabou y pa un motibo of otro a perde control, baha caminda, dal den cura di cas y kibra meter di awa.
Segun por nota riba e imagennan, e auto tabata biniendo for di pabou cu velocidad halto, a purba kita p’un auto pero a perde control su so cu su so y bay dal den un cura di cas. Taira a keda gespart mas pabou, mientras cu tabatin varios piesa di e auto kibra den “pida pida” riba Arendstraat.
Debi na e impacto fuerte, airbag di band’i chauffeur y pasahero a sali. Prome cu e autoridadnan necesario a yega na sitio, algun ciudadano mes a saca e persona for di e auto. Brandweer, polis y ambulance a presenta pa atende tanto cu e accidente como e persona cu a resulta herida. Ta trata di e chauffeur cu a resulta herida, e tabata di keha di basta dolor na su pia. A stabilis’e pa djey transport’e pa hospital, caminda cu e lo ricibi atencion medico avansa. A cera ambos band’i caminda p’asina e instancianan atende cu e desgracia aki.
