Sa cu mescos nan ta bisa, ladron un biaha ta ladron pa semper, adiccion ta e mesun cos. Nunca bo por bisa cu bo a cura. Bo ta clean pa tanto aña.
E peliger pa nan cay bek semper tey. A huur mientras tanto e cas di FCCA na Moko 28, cual awendia tey ainda y ta pidi y ta boga pa haya e cas aki den propiedad pa e fundacion. Tambe e huurgrond su dilanti pa por traha nan opvang mas grandi. Croes-Lacle ta kere cu si den 10 añanan di existencia a logr tur loke ta wak awe como un bon fruto, nan lo por logra tambe di traha miho ward, miho opvang pa e hendenan y dividi e cosnan manera mester ta.
Tambe ta boga grandemente pa ayudonan profesional, pasobra cu esey ta haci hopi falta na Aruba, no solamente psikiatra pero tambe ayudo di psicologo. A pasa door di un meeting caminda cu ta pidi pa hopi cooperacion. Ta spera cu esaki por logra. Un di e handicapnan ta hendenan profesional pa traha den e ramo aki.
Den e caso aki por bisa cu si logra haya e cas aki, ta sigur cu por traha algo cu ta corecto pa e opvang di e hendenan aki. Por brinda miho ayudo y tambe lo haci un ofishi pa hendenan cu ta studiando den e ramo aki, cu por core un pasantia y lo por busca ayudo di Hulanda via Cede Aruba tambe pa haya hendenan profesional pa bin leid op nos hendenan pa e problematica aki. E trato pa adiccion den exterior ta un trato carisimo. Tin suerte ainda door di e MOU cu tin cu Hogares Crea. Ta sigui cu e mesun areglo te ainda, aunke pa tin un aumento den e 150 dollar, dependiendo di e cas. 35 dollar ta bay pa nan zakgeld. Inflacion y costo di bida na Santo Domingo tambe a subi hopi caminda cu e hendenan aki mester di algo mas pa nan por sigui cu e tratamento. Pero al momento ta trahando keto bay cu nan. Na Aruba ta duna terapia ambulante, ta duna sosten na e famia y ta brinda hopi sortonan di ayudo na e ambulantenan cu tin biaha no ta inscribi den e programa. Cu ayudo di pueblo kier sigui cu e trabao aki cu ta algo hopi importante.
Tur dia tin hende ta bati na porta di Adopt-an-Addict. Segun Croes-Lacle, esaki ta algo cu comunidad di Aruba mester pone un brasa bao di e schouder ey tambe, pasobra hopi di nan ta yiunan di nos mesun hendenan, no ta hende straño. Pa bo bin na remarca pa bay Santo Domingo via Adopt-an-Addict, bo mester of priva of bo mester tin un paspoort Hulandes pa haya e ayudo. Cu esaki Croes-Lacle ta bisa cu nan lo celebra nan di 10 aña grandemente cu un obra teatral cu nan lo anuncia despues. Ta bezig cu tur e trabaonan aki cu tambe ta desea pa e por bay tur e scolnan secundario na Aruba, caminda cu nan por enfrenta cu un obra cu ta un realidad di bida cu ta biba eyfo, riba caya. Adopt-an-Addict ta laga tur hende en espera di e obra. E gewaarwording cu nan tin cu wak y tambe pa nan por concientisa nan yiunan, pero tambe mayornan di loke falta den cada hogar y pakico e hendenan ta coy e caminda aki, Croes-Lacle a splica.
