Dialuna awor dia 23 di october 2017 ta bira e ultimo pago pa mas o menos 300 empleado cu tabata traha cu e 9 Ministerionan di Gabinete Mike Eman II. Manera ta conoci, e contract cu e grupo aki ta pa duracion di e Gabinete specifico, cu entretanto ta termina e fin di luna aki. E empleadonan lo cobra nan ultimo salario y otro beneficionan pendiente den forma “pro rata”.
E grupo aki ta esunnan cu un contract mara na duracion di e Gobierno saliente, pues den su mayoria ta conseheronan, bode, esunnan encarga cu limpiesa y servicio, secretarianan, huristanan y asina por sigui menciona. Nan contract ta termina automaticamente asina cu e periodo di Gobierno finalisa.
Ainda lo bin acerca e grupo cu a haya trabou e ultimo lunanan, net prome cu eleccion. E siman aki Formador a bishita Departamento di Recursonan Humano (DRH) durante oranan largo, te anochi, pa repasa e situacion actual di empleadonan trahando pa Gobierno. Ta tene cuenta cu esunnan cu a bira ambtenaar, contractnan, esunnan di estudio halto of abou, esunnan cu a haya nombracion sin cu tin e funcion habri y no tin presupuesto aloca, etc. Den e tipo di casonan asina, lo manda e nombracion bek pa Conseho di Minister pa reaprobacion. No den tur caso por papia di nombracionnan politico, pa cual DRH lo mester tene algun asunto importante na consideracion prome cu duna conseho na Ministerraad.
Pa loke ta e personal di e Ministerionan, ta hopi empleado lo drenta nos mercado laboral atrobe entrante November. E diferencia ta cu e salarionan den comercio ta menos halto manera como Consehero di Gobierno. E diferencia semper ta cu e salario den Gobierno ta un poco mas halto, pero ta mara na duracion di Gobierno.
