Dialuna 4 di december lo tin e ultimo Rosario Bibo pa aña 2017 na Alto Vista pa 7 or y mey di anochi. Lo resa hunto pa tur intencion personal y pa nos comunidad. Lo resa pa amor sigui reina den cada cas di famia na Aruba.
Unda tin amor, tin paz y e famia lo ta feliz liber di tur maldad y adiccion. Nos comunidad ta conmovi den e dianan aki, pero nos sa tambe cu den shelo tin dos angelito mas pa cuida tur otro mucha. Como cu nos ta den temporada di fin di aña, lo tuma tempo pa reflexiona tocante tur loke a bay bon of menos bon den 2017. Ta temporada di Advent, tempo di speransa, tempo pa prepara pa ricibi yiu di Dios. E speransa cu e niño lo trece paz den nos curason y nos casnan di famia. Na final di e anochi special aki, Pastoor Jairo lo duna un bendicion pa fin di aña na tur presente. Comision organisado ta invita tur mucha, hoben y adulto pa bin resa hunto den famia pa felicidad di henter nos comunidad, dialuna 4 di december pa 7 or y mey di anochi.
