Fin di aña ta den porta y pocopoco ta ripara cu mas y mas luz ta wordo cendi, pa tene e spiritu di Pasco bibo, como tambe un tradicion di hopi aña. Diaranson Fundacion Seroe di Jan Flemming a bin hunto pa asina pone e ultimo tokenan, check ultimo detayenan. Esaki ta di dies aña.
Carlos Peterson a indica cu no ta facil, pa haya e sosten di comunidad, pa haya sponsor. Pero semper nan ta logra. Nan ta activo henter aña cu bendemento di cuminda, etc., pa nan haya fondo pa asina brinda e comunidad di Aruba un fin di aña memorabel.
For di luna di juli caba nan sa mas o menos den ki direccion nan lo kier bay. Nan ta cuminsa na bestel e luznan y e otronan ta wordo cumpra local, despues cu nan sa cuanto luz nan ta bay tin mester. Y asina e proceso ta cuminsa cana pa asian tur cos ta cla na tempo.
APERTURA
E apertura lo tuma luga diabierna 8 di december, cuminsando pa 7:30pm, c’un presentacion di Randall Croes, cu lo canta algun cancion di gospel. E ta un manera pa gradici tambe pa e oportunidad di t’ey un biaha mas.
Despues di Randall Croes ta sigui Robert Maduro y su banda Azucar, cu lo deleita un y tur presente cu nan dushi musica.
BAR Y CUSHINA
E anochi aki tambe, manera semper bar y cushina lo ta bon surti. Lo tin spam tempera, croket, pastechi, aros con pollo, como tambe sanger yena.
Invitacion ta bay na un y tur pa pasa bishita nan, pa presencia locual e comision a traha duro pa trece esaki pa e comunidad di Aruba.
SEROE DI JAN FLEMMING
Por ultimo, Peterson a indica cu esunnan cu a dicidi na decora e seroe aki tur ta famia cu ta bin biba cerca den e bario di Jan Flemming. Nan tur a cera cabes hunto pa asina trece algo bunita dilanti door di decor’e y asina un bunita tradicion a cuminsa, cual e aña aki ta cumpli su di dies aniversario.
