Comision di Festival di Tumba di SMAC e aña aki a dicidi di haci un cambio, door di hiba e Festival di Tumba pa Balashi Beer Garden.
Geraldine Buckley, vice-presidente di SMAC, a indica cu e echo cu a manda Festival di Tumba pa Balashi Beer Garden, door cu e cantidad di participante no tabata mucho grandi.
Pero esaki no a haci niun sorto di influencia riba e cantidad. E publico a gosa di diesun super bon tumba, super bon prepara. E cantantenan bon prepara y manera anuncia anteriormente, esaki tabata Tumba pa Tumbabo.
SMAC ta masha contento cu e concepto di pre-final den e festival akl. a saca top 5, cual nan tabata Chendell Beaumont, Gilane Wester, Anoushka Odor-JeanD’or, Jerwin Hernandez y Quincy Hasham.
For di e cinco semi-finalistanan a saca e dos finalistanan mas e rey di tumba.
Carnaval 70 lo cuminsa mas trempan. No por lubida cu a bin for di un pandemia y e directiva ta nobo, mester a cumisna di nobo.
Por ultimo, Geraldine Buckley a gradici un y tur cu a yuda den haci Aruba su festival di tumba grandi un biaha mas. Tambe un palabra grandi na Balashi Beer Garden pa tabata e host di Tumba Festival 2023.
REY DI TUMBA
Diadomingo, pa 2:30am, a anuncia e Rey di Tumba 2023, cu a resulta di ta Chendell Beaumont.
Chendell a indica cu e ta un dushi sentimento, e ta un momento cu bo tin cu bib’e, e emocion cu bo ta haya ora cu bo wordo corona. No por describi den hopi palabra e sentimento cu ta sinti n’un momento asina.
El a splica cu su tumba ‘Atami aki’ tabata algo cu el a pasa aden hopi biaha. Ta bay un actividad y ta puntra bo amigonan si nan ta bay, nan ta contesta cu si. pero ora cu bo yega, ta mira un multitud di hende cual ta haci cu bo ta bay app, yama pa puntra unda nan ta para. Esey a inspir’e pa el a skirbi e tumba,ya cu Carnaval ta un actividad of celebracion cu ta atrae hopi hende, pa cual bo ta pidi pa nan hisa nan man pa waknan.
Mas aleu, Beaumont a sigui bisa cu tumba ta un hermandad musical entre e islanan ABC. Suona ta un entertainment band y Rincon Boyz ta un grupo criojojo. Pero nan ta dos banda cu no ta forma e banda cu por bay un festival di tumba. Pa por a forma un banda cu por carga e tumba, nan a invita dos musico cu no tin compromiso niun otro caminda, den e caso aki for di Corsou, cu ta forma parti di Gentz, pa bin yudanan.
Na ultimo, por bisa cu hunto nan a forma un banda cu tabata un combinacion entre Rincon Boyz, Suona, Buleria, D’Licious, Gentz y esey ta locual kier yega na dje: un hermandad entre e rumannan musico.
Segun Chendell, e ta carga e corona como Rey di Tumba pa tur e Carnavalistanan. El a pidi pa “Ban celebra Carnaval sanamente.”
