Diamars mainta pa merdia tabatin un accidente a tuma luga riba Green Corridor na altura di Pos Chikito, unda un persona a resulta herida y basta daño material.
Tabata rond di 11.30 cu un truck di pan di Bright Bakery tabata bahando for di pariba y na mesun momento tabatin un otro truck bayendo e mesun direccion cu ne, pa Playa. Riba e pickup di carga tabatin un garoshi. Con esun a move bay dal den otro no ta conoci. E Polisnan mester bay haci investigacion eybou pa mira tur marca di brake y otro datonan. Hecho ta cu un di e vehiculonan a ranca un poste di luz y despues na final ambos a keda den e parti memey cu ta separa e dos camindanan for di otro.
Un persona den e truck di pan a keda herida pa cual a pidi presencia di ambulance pa atende cu ne. Ambos truck a keda destrui y a pidi Takelwagen pa move e vehiculonan, cual a causa cu mester a cera e caminda un rato pa e trabounan necesario.
