Manera indica anteriormente, polis tabata hopi ocupa cu diferente pelea durante y despues di Jouvert Morning. E biaha aki tabata dilanti Joe Laveist Ballpark, t’un sitio “den boc’i leon” p’e simpel motibo cu ta masha cerca caminda polis tin su Mobile Command Center caminda ta vigila tur cos via camara.
A capta net ora cu dos grupo a topa cu otro y manera gasolin cu candela a golpia otro formal. A tira boter riba otro, salada di mokete y e skopnan tampoco a keda afo. Nan no a conta cu e team di Mobiele Eenheid (ME) di polis tabata den cercania.
Ora ME yega, nan no ta worry ken a bringa of no, ta bay pa restaura orden publico, tur cu ta den nan caminda ta come sla of ta bah’un klop riba bo lomba.
A detene tres hende homber. Nan ta forma parti di e ekipo perdedo di e pelea, e otronan a logra huy prome cu polis a yega na sitio. Den un transporte policial a hiba nan pa warda di polis caminda un sub-fiscal lo atende cu nan detencion.
