Deyanira Mohammed y su pareha Jonathan Croes ta den un situacion sumamente tristo y nan ta fada di e situacion caba. Cinco aña bibando riba caya, sin un dak riba nan cabes. Departamento Asuntonan Social (DAS) no por haci nada pa yuda nan cambia nan estilo di bida.
Mohammed a bisa cu aunke nan ta persona cu ta biba riba caya, nan kier ayudo pa yega na un cas. A cana varios caminda, entre otro a bay DAS, FCCA y a papia cu Endy Croes, pero te ainda no a logra nada. Tambe nan ta pidi ayudo, kisas di Cruz Cora pa nan haya cuminda.
“Ta pidi pa no laga nos na caya. Mi a bay DAS y nan a blokia e placa di bijstand di mi pareha. E tabatin un trabou, pero nan a kit’e. Mi pareha ta sufri di asthma y ami ta epileptico. Si tin trabou nos por haci, manera chapimento di cura.” E mes, segun Mohamed, por cuida mucha of hende grandi.
El a splica cu awo nan ta bibando den un scol bandona, drumiendo riba suela, ya cu esey ta e unico luga cu tin pa nan biba. E ta admiti cu nan ta hendenan special pero ta pidi pa respeta nan como ser humano. Su pareha no por lesa ni skirbi. “Mi ta pidi boso yuda nos.”
Cualkier ayudo por bay via di e ruman Roderick Croes, pero e no por a duna un number di telefon pa contact e persona en cuestion.
