E ta un situacion cu ta andando pa algun tempo caba. Un habitante preocupa a bati alarma cerca 24ora.com despues cu a bay na tur instancia, esta polis, Bureau City Inspector, DOW pero sin resultado.
Tin un trailer bieu para riba acera pa casi dos aña caba pa cual ta stroba e pasada di peaton. Irvin Gumbs di 70 aña a sali padilanti pa vocifera su preocupacion. Dilanti e cas caminda e trailer ta para, a duna un entrevista na 24ora.com. E bisiña no a keda contento cu su presencia.
Segun Gumbs, e trailer para riba acera ta un problema. E hasta bira un problema mirando cu peaton tin cu desvia for di acera, bay riba caminda cu consecuencia peligroso pa nan.
E kier sa dicon e trailer ta para riba acera y te ki dia lo keda para eybanda. E trailer no tin permiso, no tin plach’i number y nada registra pa stroba peaton.
E no sa unda mas pa bay pa haya un contesta, polis ta na altura di e situacion pero no ta haci nada. Gumbs ta hasta cuestiona cu su bisiñanan ta acus’e di a purba alcansa un otro bisiña cu auto. “It should be moved”, asina Irvin Gumbs, habitante preocupa a termina bisando.
Tin cu bisa di biaha cu representante di 24ora.com a puntra e otro partido si nan kier duna nan band’i medaya pa cu e situacion aki, pero a nenga di duna declaracion.
