Pa exactamente 11or di mainta, manera a keda acorda, mayoria personal di WEB Aruba NV a sali for di e facilidad pa ehecuta nan accion di protesta contra e continuacion di e reduccion di 12.6% for di nan salario.
Alrededor di 200 funcionario di e compania estatal a participa den e accion, segun calculacion di president di SIWA, Erick Henriquez. E accion tin, inicialmente, un duracion di 1 ora. Sinembargo, manera president di sindicato VWI, Richard Frank, a duna di conoce, nan ta keda activo henter dia y lo sostene tambe otro gruponan den e lucha.
Ambos sindicato ta representa empleado di e compania di produccion y distribucion di awa y coriente. Y mientras cu pa awo, a garantisa cu e suministro di e utilidadnan aki no ta afecta, no ta kita for di e determinacion cu nan tin di sigui pone presion riba Gabinete Wever Croes II pa hala aden nan decision di sigui tuma 12.6% di nan salario pa un tempo indefini. Ambos sindicalista a sigura cu, a pesar cu e trahadonan den funcionnan clave di operacion tambe kier a uni na e accion, resposabelmente a bay di acuerdo pa keda na warda.
