Trahadonan di Inmigracion Aruba no kier mira Trudy Hassel como esun cu ta responsabel pa maneho di imigracion y nan tin nan motibo tambe.Rene Bernabela, presidente di TOPA, a splica cu e situacion na Imigracion Aruba no a cambia te asina leu.
Tabatin un reunion pendiente cu Minister Andin Bikker cu mester a tuma luga siman pasa, pero pa motibonan no mucho cla esaki a wordo posponi. A resulta cu e siman aki tampoco e reunion no ta sigui, mirando cu e Minister a informa cu pa motibonan di diferente reunion cu e ta aden y cu diahuebs awo tambe tin reunion den Parlamento, probablemente pa e siman aki e no lo continua. Nan a haya siguransa cu pa otro siman si e reunion aki lo wordo poni riba agenda.
Rene Bernabela di TOPA: Trahadornan ta exigi pa Trudy Hassel keda leu di Migracion Aruba
Posted by 24ora on Wednesday, June 5, 2019
Bernabela a splica cu e Minister tin un bista cla, di loke ta e preocupacion di e personal di Imigracion Aruba y kico ta tumando luga. E personal di Imigracion a entrega un total di 4 pa 5 pagina di keho riba e forma con e Management Team ta traha e asunto di formatierapport, cu locual e trahadonan a considera no ta e manera apto y corecto pa atende cu e situacion aki. Na momento cu TOPA a entrega e kehonan aki por escrito, Minister Bikker a saca su conclusion y esey a conduci cu a onthef e Management Team.
Management Team
Na e momentonan aki cu a deshaci di Management Team aki, e proposicion di e Minister ta bira e ora si sindicatonan mes ta bay nombra personanan den e Management Team nobo. Si wak bon, practicamente no falta mucho detaye mas pa caba cu e formatierapport. Esey ta e parti cu mester caba y tin cu ehecuta e di dos buelta pa loke ta e structura di salario cual falta den e formatierapport.
Departamento di Recuros Humano kier bin cu un structura nobo di salario cu nan a tuma for di Departamento di Brandweer y kier pone esaki tambe pa Imigracion Aruba, tambe pa KIA y CEA.
Trudy Hassel
El a bisa tambe cu un di e motibonan cu Trudy Hassel no ta bon bini pa personal di Inmigracion, ta su forma di trata cu hende. Nan ta rabia pasobra e ta trata hende malo. Na iniciio a dun’e beneficio di duda y a dun’e un chens toch pa drenta.
Rene Bernabela a comenta cu loke semper el a siña den banki di scol, ta cu unda cu no tin comunicacion, cos ta bay fout. Esaki ta e punto di salida tur caminda. Y si bo no tin esaki den bo prome argumento, bo ta cuminsa cu loke nan ta yama un “valse start”. Bo ta cuminsa cu un paso kiboca, pasobra e parti di comunicacion cu bo personal, ta di suma importancia; bo mester tin un bon comunicacion. “Si bo no sa di prome introduci bo mes corectamente na e personal, cu ta bo deber di haci, y kico bo a bin haci na e departamento, e ora tin cu cuestiona cu ki sentido bo ta kere cu lo bo bay haya e cooperacion di e personal di e departamento.”
No por tin nunca un bon comienso pasobra e parti di comunicacion no ta den funcion na e momento ey. Tambe e persona cu ta bay ehecuta e funcion di hefe di e departamento, mester tin conocemento di maneho. Tampoco si bo no tin e conocimento di maneho, no sa manera con pa papia cu hende, no sa con pa trata cu hende, e ora bo no por ta apto pa ta un hefe di un departamento, pasobra e cualidadnan cu bo mester posee, bo no tin nan. Bo no ta capacita pa ta e hefe di e departamento concerni eynan.
Ta pa e motibo aki mes mester bin un solicitud caminda cu mester por tin un comision cu ta bay screen esnan cu ta interesa pa fungi como hefe di e Departamento di Inmigracion pa wak si nan ta capacita pa por fungi como hefe y kico ta nan cualidad pa loke ta e parti di maneho.
Riba esey tambe bo mester por tin un tiki conocemento pa loke ta e parti di e leynan cu ta toca e parti di LTU.
E persona mester sa tambe kico ta come y bebe di e departamento aki. Si esey no ta e caso, e ora ta gastamento di placa y no kier hende wordo nombra politicamente, sin tin e conocemento kico ta concerni e Departamento di Inmigracion.
