E investigacion a dura mas of menos 1 aña largo, den cual a interoga varios persona y a analisa e scenario di e accidente, restonan di e avion y e blackbox. A conclui cu no ta un persona of entidad, sino varios factor a hunga un rol cu a conduci na e accidente fatal dia 13 di maart 1996. Gregory Croes, un piloto di Avia Air, cu de facto tabata esun cu lo a bula e avion pero cu a cambia na ultimo momento, ta repasa e hechonan awe, 25 aña despues. Ta despues el a realisa cu su colega Siegfried Stede, e piloto cu a fayece den e tragedia, a mand’e varios señal y a despedi di dje tres biaha…sin cu e mes a realisa of por a compronde na e momento ey.
E victimanan
Di e ocho victimanan, seis tabata di nacionalidad Hulandes, naci na Aruba. Ta trata di e piloto mes, Siegfried Stede, Hubert, Leandro y Lourdes Thiel, Sebastiana Leito-Geerman y Heinrich Leito. Tambe tabatin un Colombiano, Orlando Ortega y un Mericano, Jason Sigel. A trece e restonan mortal Aruba bek pa cual e entieronan a sosode aki mes.
E hechonan
Tabata un dia comun y coriente, diaranson dia 13 di maart 1996. E prome vuelo di dia, Siegfried Stede a opta pa bula e avion di matricula P4-AVB cu number di vuelo Avia Air 2000 cu a sali 7:15 am for di Oranjestad rumbo pa Punto Fijo. E vuelo ta dura 18 minuut largo. Despues di 5 minuut di vuelo, ora tabata saliendo di espacio aereo di Aruba pa drenta esun Venezolano, na 12 miya for di Aruba, a presenta problema cu e motor banda drechi. Consecuentemente e motor a pega na candela, cu a causa cu e hala banda drechi a los di e avion y bin abou cu motor cu tur, na un haltura di mas of menos 100 meter for di tera. E avion a cay y tur 7 pasahero y a piloto a fayece. E avion a cay den un area poco inaccesibel. Sinembargo, ehercito Venezolano a haci todo por todo pa yega na e restonan mortal y a manda tur bek pa Aruba den avion.
Pa mas informacion, detayenan y e storia completo di e tragedia di 25 aña pasa, lesa e edicion di TREMPAN di dialuna awo.