Diadomingo Varadero Aruba Marina & Boatyard, pa prome biaha, a organisa e ‘Release Masters Billfish’ Tournament.
Laura Peñate a indica cu e interes pa e torneo aki tabata super bon, unda cu a bin cinco boto for di Corsou, pero tambe nan tabata tin un team procedente di Merca. For di Aruba mes nan tabata tin dies boto cu a participa.
E ganadonan di ‘Release Masters Billfish’ Tournament tabata como lo siguiente:
- Hechicera (boto di Corsou)
- Alina (boto di Aruba)
- Hazel Ann (boto di Merca)
Peñate a indica cu nan tin planea di organisa esaki anualmente, den luna di october.
SALTY KIDS FISH TOURNAMENT
Sin lubida, nos muchanan tambe a participa den e torneo di pesca, Salty Kids. Esaki ta un torneo di pesca cu Varadero Aruba Marina & Boatyard ta organisa specialmente pa mucha di 2 te cu 12 aña. E aña aki tabata e di tres aña cu nan a organisa e torneo aki.
Peñate a indica cu tur aña e torneo aki ta haya un super bon acogida, te cu nan mester cera e inscripcion prome cu e tempo, pasobra cu e ta bira mucho hopi.
Pa loke ta e resultadonan, esaki ta como lo siguiente:
Di categoria 2-5 aña:
- Noah Winklaar
- Rayven Ras
Den categoria 6-9 aña
- Kendell Kock
- Elaiza Pinson
Algo sigur bunita pa wak con dos damita ta bay cu e premionan.
Den categoria 10 -12 aña
- Kai Croes
- Junior Vrolijk
Tabata algo bunita pa mira con e muchanan, den compania di nan mayornan, nan demas famia, tabata disfruta di e evento aki. Un evento sigur digno di admiracion.