Tene bon cuenta: Profecia ta bini di Dios y adivinansa ta diabolico.
Den e tempo trabahoso cu mundo ta pasando aden, pa motibo cu e binida di Cristo ta acercando, y e wega di diabel ta bay cabando lo lanta hopi profeta falso, y hopi hende lo entrega nan mes na adivinansa.
Hopi hende pa motibo di biba den inmoralidad y impuresa, caminda nan relacion cu Dios ta hopi debilita, of nan a rechasa Dios cu nan rebeldia y nan bida den scuridad, ta prefera biba un bida rondona di hende cu ta mira carta, hacido di bruha of cu ta practica santeria mescos cu Farao.
Hopi mandatario cu ta den poder rond mundo ta consulta bruhanan of ta consulta cu morto ( Rey Saul) pa asina averigua cu nan ta keda den poder of nan gobierno a yega na un fin.
Entre boso no mag wordo haya ningun hende cu ta haci su yiu homber of yiu muher pasa door di candela, ni ningun hende cu ta practica lesamento di carta, of cu ta practica bruheria, of cu ta pronostica, of cu ta practica magia.
Ni ningun hende cu ta plega hende, of cu ta montado, spiritista, of cu ta consulta cu e mortonan. Pasobra ken cu haci e cosnan aki ta un abominacion pa Señor, y pa motibo di e abominacion aki,Señor bo Dios lo core cu nan for di bo dilanti.
Bo mester ta perfecto dilanti di Señor bo Dios.( Deuteronomio 18:10-13).
Profeta ta un yamada di Dios, e no por ser cumpra cu placa pasobra un profeta tin cu papia locual Dios pone den su boca.
Awendia mundo a bira moderno y controversial cu hende kier studia como profeta, sin tin e yamada di profeta.
Como cu den tur cos placa ta drenta aden como engaño, nan ta sali cu certificado of diploma di profeta, pero nos tur sa cu e yamada Profetico ta bini solamente for di Dios, y na e fruta bo ta sa ken ta profeta berdadero of ken ta un babado.
Anto Señor a bisa mi: E profetanan ta profetisa mentira den mi nomber. Mi no a manda nan, ni a duna nan ordo, ni a papia cu nan: un vision falso, lesado di carta, cos sin ningun balor y decepcion, di nan mes mente nan a profetisa na boso.( Jeremias 14:14)
Profecia berdadero ta di acuerdo cu e palabra di Dios.( 2 Timoteo 3;16).
Profecia berdadero ta glorifica Hesus y no e profeta y no ta pone e profeta riba un pedestal (1 Juan 4:1-3).
Profecia berdadero ta guia hende na Dios, na un bon relacion cu Dios, y na humildad, y no orguyo,
Profecia berdadero ta produci libertad, pasobra e ta di Spirito Santo, e no ta produci atadura, condenacion,confusion. ( Romanonan 8:15) ( 2 Corintionan 3:15).
Profecia berdadero ta 100% corecto y lo sosode ( Deuteronomio 18: 21-22).
Profecia berdadero ta bini di Dios, Dios ta e fuente ( 1 Corintionan 12:4-11).
750 aña prome cu Cristo Hesus a nace Isaias a profetisa nacemento di Hesus ( Isaias 7:14 y Isaias 9:6-7).
Hesus a spierta mundo completo tocante di profetanan falso cu lo lanta y cu diabel lo uza pa haci señalnan y si ta posibel, lo gaña hasta e eligi nan.( Mateo 24:24-25).
P’esey no ta bon pa cana puntra hende si nan tin un palabra pa bo,of busca palabra di profecia, pa bo no wordo gaña, pasobra ora Dios tin un palabra pa bo , Dios mes lo mand’e pa bo, spera riba Señor y no depende di hende.
Ta tempo pa uni den nos cas y busca cara di Dios, pa Dios, libra nos for di hende cu tin spirito di bruheria.
