Mucho ta esunnan cu desde 2017 a sa di participa den e competencia di fotografia unico aki cual ta capta e naturalesa y e cara di nos hende nan di nos dushi Aruba. Lastimamente door di e pandemia nos no a logra lansa nos di 4 edicion di e competencia aki na 2020.
Awe ArtisA conhuntamente cu Prins Bernhard Cultuur Fonds ta feliz di por trece e di 4 edicion di un competencia di fotografia unico; Nature & Faces.
ArtisA (Art is Aruba), cual ta un promovedor di arte y organisado di diferente proyecto artistico manera e famoso Aruba Art Fair, ta feliz di por trece un tiki bida den e mundo di fotografia. Participante nan lo por gana un Gift Card di BNH Video Photography na balor di $500 y alabes e oportunidad pa expone nan fotografia na Doral City Hall, Florida.
Nature & Faces a haya un bon acogida y atencion internacionalmente na momento cu Doral City Hall, Florida a habri su portanan pa expone nos 5 clasificadonan di Nature & Faces 2017.
Nos tin di bisa cu desde 2017 Doral City Hall a expone fielmente tur aña nos clasificadonan y e bunitesa di Aruba su hendenan.
E competencia di fotografia aki a cuminsa como un simpel deseo di nos fundado. Tito Bolivar, unda cu e deseo tawata pa mira con nos dushi hende nan lo por capta e mas di 100 nacionalidad cu ta biba awendia riba nos dushi Aruba y su dushi naturalesa unico.
Y ta pa es motibo cu e competencia unico aki ta parti den 2 categoria.
1. Naturalesa; den e categoria aki por participa door di subi un potret di locual ta e parti mas bunita di nos naturalesa. E por ta un potret di un animal, un paisahe, of un combinacion di varios elemento den nos naturalesa local.
2. Caranan; den e categoria aki por participa door di subi un potret di locual ta e capta e bunitesa y e diversividad cu ta reina riba nos dushi isla entre e mas di 100 diferente nacionalidadnan cu ta biba den harmonia. E por ta un potret di un persona su so, hende nan den grupo, pero e esencia mester ta bek den e cara di e personanan.
E aña aki, e artista renombra, Armando Goedgedrag lo tuma na su encargo e liderazgo di e categoria “Naturalesa – Nature”, y SGlen Geerman; e fotografo renombra lo ta encarga cu e categoria di “Caranan – Faces”.
Con pa participa?
Pa participa ta facil. E fotografo mester bishita e website www.natureandfaces.com y registra su persona. Despues por subi (upload) e fotografia den e categoria faborito. Mas informacion y e reglanan por lesa riba e website.
Pa finalisa e concurso aki, lo tin un exposicion di tur clasificado di Nature y Faces den ArtisA su galeria na San Nicolas, unda Aruba henter por pasa admira e obranan y vota pa kende lo bira e ganado absoluto di 2021. Alabes e clasificadonan su obra lo ser exponi na Doral City Hall, Florida. Ademas e ganado ta bay cu e premio di $500.00 na BNH Video Photography manda completamente gratis pa Aruba.
Pa mas informacion bishita e website www.natureandfaces.com of yama +297-593-4475. ArtisA ta un organisacion “non profit” cu ta traha pa engrandece Aruba su Arte y Cultura.
