Diadomingo ultimo, Team SNOR, e ekipo conoci pa nan uniform mas original den liga di domino, a tene nan ya conoci actividad anual titula “NOS cu NOS.” Den ora di merdia e fanatico- y integrantenan di Team SNOR, bou liderazgo di “Snor” Perez, a cuminsa yega pa asina e bataya entre nan mes por cuminsa 2:00 pm.
E formato “NOS cu NOS” ta uno hopi gusta den temporada di fin di aña, ya cu e ta duna un bunita oportunidad pa bin hunto como colega di team, gosa e ambiente di Pasco. Pero alabes bataya otro formando ekipo di dos integrante pa logra saca cua ta e dos miembro di team cu ta miho p’e aña en cuestion. Na final, nan nomber lo bay den eternidad riba e wisselbeker famoso.
Mustrando nan caliber, e conocido dokter den pega piedra, Tico Dirksz, hunto cu su patna Tony Deny, a bay tres rond invicto, pasando dos sapato blanco, pa despues sinta warda confortablemente kendenan lo sali for di losers round pa bin reta nan na final. Aki a surgi e duo “Snor” Perez hunto cu Greg como nan contrincante p’e rondo final. Aki, Snor cu Greg a pica bay dilanti cu 1 – 0, pero di biaha Dirksz y Tony a tuma control dje partido y ganando dos wega tras di otro, incluyendo un sapato blanco.
Tico Dirksz y Tony Deny a logra titula campeon dje competencia di “NOS cu NOS” di Team Snor pa aña 2022! Un pabien grandi ta bay pa tur integrante y fanatico di Team Snor pa un aña hopi exitoso y por ultimo ta desea nan un bon Pasco y feliz 2023.
