Dialuna a tuma luga un conferencia di prensa, Minister di Asuntonan Economico, Telecomunicacion y Desaroyo Sostenibel, mr. Geoffrey Wever a papia riba diferente tema y naturalmente, prensa a sa di haci su preguntanan.
Un di nan sigur tabata e reunion cu e minister a sostene cu e gobernador di estado Falcon, esta Victor Clark, cual sigur tabata un tema di discusion.
A discuti diferente tema entre e minister y e gobernador. Den e reunion cu e gobernador a toca tema di e preparacion di e Virtual Business Matchmaking, cual ta trahando riba dje, entre e comerciantenan di Aruba y esunnan di Venezuela.
Tabatin combersacion riba e contenido di e agenda, con ta bay hiba e Virtual Business Matchmaking aki, kendenan lo participa, con e organisacion ta y tambe a cuminsa papia riba e mision comercial cu kier haci pa Venezuela, hibando e empresarionan Venezuela, p’asina topa cu su coleganan di e pais bisiña y pa por stimula y motiva e empresarionan pa importa, pa haci negoshi cu Venezuela, na beneficio di e consumidor Arubano, buscando manera pa baha prijs, trece producto nobo y bin cu oportunidad economic nobo.
Esey tabata e topiconan di combersacion cu e gobernador di estado Falcon.
NO TA TRUNCA E PROCESO
E frontera Maritimo ta habri cu Venezuela y esey n’e momento aki ta duna oportunidad pa sigui explora oportunidad riba e tereno aki. Segun e minister, e randvoorwaarden ta pa e frontera maritimo ta habri, cual t’e caso. Awor aki mester busca manera pa inventarisa kico t’e otro obstaculo cu por tin p’asina hunto por purba di reduci esaki y di e forma ey stimula cu e empresarionan por haci negoshi bek, importa mas producto di Venezuela y trece miho prijs y servicio pa nos consumidornan.
Ningun momento a papia di habri e frontera aereo cu Venezuela durante e reunion cu e gobernador di estado Falcon, e minister a bisa na dado momento, durante e conferencia di prensa.
