Telefon pa Hubentud no ta descansa. Nan ta keda opera durante vakantie y dianan di fiesta. Segun Shurman Milliard, trahado social na Telefon pa Hubentud nan a keda sigui prepara e muchanan pa e aña escolar cu ta bin. Otro aña tambe nan kier prepara nan miho posibel.
Con ta haci esey
TPH ta keda laga tur hende sa cu nan t’ey. Nan ta dunando charla ainda. Por ehempel a bay na centronan di bario, Clubnan di scout, etc. E trabao di Telefon pa Hubentud ta continua. Naturalmente e yamadanan ta keda drenta durante vakantie. Number 131 nunca ta paga. Nan ta sigui haya nan yamadanan. Pero kico nan ta haci actualmente.
Nan ta preparando tur nan charla, tur presentacion y proyecto, pa ta mas cerca di e hobennan ora cu e aña escolar cuminsa. Tin un Jongeren Raad, cual ta tres hoben cu ta yuda di tur banda. Kier laga TPH sa con e proyectonan por ta mas specifico pa diferente doelgroep. Durante vakantie nan ta bay revisa tur charla, nan ta bin cu potretnan nobo, cu videoclips nobo, p’asina e informacion ta mas cerca y mas nobo pa e hobennan.
Lo ta hopi laf si ta papia di cualkier cos, den varios ocasion, tras di otro e mesun cos y p’esey nan kier renoba tur nan materialnan.
Tambe nan kier bin cu charlanan nobo. Un di e charlanan cu a pidi pa nan bin cun’e, ta esun di prepara e 5de y 6de klassers pa e overgang jaar. E aña di 6de pa 1ste MAVO ta un periodo hopi importante pa nos hobennan. Loke cu TPH kier laga sa, ta laga nan pensa ken nan ta, kico nan kier logra e siguiente aña y e aña aki ainda.
Mester laga e dinamica di grupo bin dilanti, segun Milliard, unda e hoben lo ta den e grupo, si e ta un lider of un siguido, of un hende cu ta haci joke den klas. Tur esakinan ta trece dilanti den e charlanan di TPH, cu ta hopi beneficioso pa e muchanan mes. Aki ta caminda e muchanan por saca afo pa nan mes, cu si nan por bira un rolemodel den su klas, kier ta un lider, etc., con pa uza esaki pa yuda mas hende den su klas.
Por mira cu e efectonan di e charlanan aki, ta hopi grandi. Un docente por mira si un alumno ta un rolemodel pa e klas, por influencia positivamente y haci cosnan positivo. Esey ta nifica cu otro muchanan ta bay wak’e como un lider, bis’e cu e ta un lider y e ta bay actua tambe como un lider positivo. E ta bon pa e aña ey, pero ora cu e bira mas grandi y bay un scol secundario, e sa ken e ta y con e por ta mas positivo den carni propio y tambe den e grupo cu e ta aden.
Esaki ta un di e maneranan cu TPH ta prepara e 6de klassers pa e transicion pa prome aña di secundario y pa e resto di e trayecto di e scol nobo.
Esaki ta dos aña tras di otro hopi importante pa cualkier mucha y tambe pa ora e ta un adulto.
Importancia
Hopi biaha nos por mira cu un adulto cu problema, ta causa for di tempo cu e tabata hoben. Milliard a comenta cu esey ta algo cu ta sumamente importante. TPH ta enforsa riba e rolemodel positivo den un mucha su bida cu despues e por bira asina tambe den futuro.
Un “positive rolemodel” pa un mucha homber y mucha muhe ta hopi importante. E no mester ta un adulto, e por ta un hoben positivo tambe. Si duna e luz pa nan briya, ta hopi importante. Otro muchanan ta bay wak esaki como algo positivo, algo cool cu nan kier haci esey tambe.
Un rolemodel ta positivo den un klas, y bo ta bay wak cu tin mas rolemodelnan positivo den e klas ta surgi. Ora bo ta chikito e ta importante, pero ora bo ta den 3de of 4de MAVO, of hasta si sigui den estudio mas avansa, ta un posicion hopi importante pa bo mes, pero tambe pa comunidad.
TPH kier crea mas di tipo di rolemodenan positivo aki pa Aruba.
