Diamars mainta fundacion Telefon Pa Hubentud a bishita Colegio Cristo Rey caminda nan a tene varios actividad cu diferente klas den cuadro di dia internacional di derecho di mucha, esta dia 20 di november binidero.
Segun Kimberly de Cuba, trahado social di Telefon pa Hubentud a splica, den esakinan e muchanan lo haya informacion tambe tocante kico ta nan derechonan. Cu 4de klas nan a haci un actividad den cual e muchanan por a comparti kico nan gusto personal ta cu nan klas. Asina nan por comparti un poco di nan bida pero banda di esaki a trece diferente ponencia dilanti y aki e muchanan por a duna nan opinion si nan ta di acuerdo cu esakinan of no.
Cu e 5de klas, Telefon pa Hubentud a haci un actividad cu e muchanan yama ‘Timeline’. Aki e muchanan mester a pinta un ‘timeline’ di ora cu nan ta lanta te ora cu nan ta drumi cu ta mustra kico tur nan a haci durante e dia y despues a splica nan con durante e transcurso di e dia nan a cumpli cu diferente derecho di mucha. Pa loke ta trata e actividad cu e muchanan di 6de klas nan a haci un sesion di debate. Aki atrobe a trece algun ponencia dilanti y e muchanan por a duna nan opinion tocante esakinan.
Pa cobertura mas amplio lesa edicion di TREMPAN mañan.
